14 Apr 2025

 Banni ba Topisi le Moreomabele ba rotloeditswe go dirisa lenaneo le lesha la Bonno Housing Scheme. 

Ba rotloeditswe jalo ke Mopalamente wa Palapye, Rre Onneetse Ramogapi fa a buisa diphuthego tsa kgotla kwa metseng eo bosheng. Rre Ramogapi a re puso e itlamile go aga matlo a le 100 000 mo dingwageng tse tlhano e le maikaelelo a go hema letlhoko la boroko jwa bodiredi le bonno jwa Batswana.

A re puso e fokoditse metsi ka 30 per cent gammogo le go fokoletsa Batswana madi a dikoloto tsa metsi ka sephatlo. Rre Ramogapi a re phokotso ya dikoloto tsa metsi e simolotse Moranang a rogwa mme e wela Seetebosigo a fela. O ba rotloeditse go dirisa sebaka se go duela metsi gore ba akole phokotso e gammogo le go rulaganya le lekalana la metsi gore baka duela sekoloto bonolo jang.

Rre Ramogapi a re ba dira jaana go tokafatsa matshelo a Batswana, a tlhalosa gore ba okeditse madi a itshetso a bana ba ithutelo tiro ya diatla go nna P1 900 go tswa kwa go P300, a bolela ka P300 wa batsetsi gammogo le go abela basetsana ba sekole mesangwana le go oketsa madi a bagodi go nna P1 400 go tswa kwa go P830.

O kopile Batswana gore ba seka ba fela pelo ka tse ba di ba solofeditseng ka ba na le dikgwedinyana fela ba busa mme e bile ba fitlhetse go sena madi. A re ba buseleditse lekgotla la dipuisanyo tsa dituelo tsa babereki la Barging Council, a tlhalosa gore le tsweletse ka dipuisanyo. O tlhalositse gape gore lenaneo la dituelo tsa badirelapuso la Fan Shape le tlaa diragadiwa.

Fa a itebaganya le seemo se se maswe sa dikole, o ne a tlhalosa fa puso e na le thulaganyo ya go baakanya dikole tsotlhe. Fa a tsibogela kgang ya phane, a re o tlaa bua le lephata le le lebaneng ka gore batho ba ba bapalang phane ga ba sale morago tse di tlhokwang. Rre Ramogapi a re teseletso ya go bapala phane e batla gore ba bo ba na le matlwana a boitiketso mme ga ba na nao. O ne gape a akgolela dikomiti tsa ditlhabololo tsa metse ya Topisi le Moreomabele go dira ditlhabololo tse di bonalang.

Kgosi Ezekiel Bontsi wa Topisi o ne a leboga mopalamente go bo a ba lekotse le mananeo a a tlang ka one. Kgosi Bontsi o ne a lekodisa mopalamente gore ga ba jesiwe diwelang ke kgotlelesego ya tikologo e e dirwang ke babapadi ba phane.Kgosi Bontsi a re go nnile le tshologelo ya batho ba bantsi ba tsile go bapala phane mo kgaolong ya bone.

Mokhanselara wa Topisi/Moreomabele, Rre Israel Tsiapane o supile fa kgaolo ya gagwe e tlhoka ntlwana ya pelegelo, a lela gape ka letlhoko la metsi le motlakase kwa ditsheng tse disha. Rre Tsiapane a re go dirwe melawana e mesha e e ka sireletsang phane le mafelo a e bonwang kwa go one. BOKHUTLO