28 Aug 2024

Bagodi le ba-na-le bogole ba tshwanelwa ke tlhokomelo e e faphegileng mo go tsa botsogo gore matshelo a bone a itekanele.

Fa a bua kwa mogwantong wa Dinokeng o o neng o diretswe go kokoanyetsa ba ba tlhokileng lesego madi bosheng, mogolwane wa BotswanaPost, Rre Cornelius Ramatlhakwane, o boletse tiro ya go kgobokanya madi, e e rulagantsweng ke Madikwe Community Care Group kwa Malolwane,.

A re setlhopha se se batla go aga legae le bagodi ba tlaa tlhokomelelwang kwa go lone.

Rre Ramatlhakwane a re BotswanaPost e ne ya patelesega go dumela kopo ya go tsaya karolo mo mogwantong o ka go tlhokomela bagodi e le gone go aga setshaba.

O tlotlomaditse tiro e ya bobelotlhomogi a re e leka gore dikeletso le matlhoko a bagodi le ba-na-le bogole a kopantshiwe. O bile a bua fa BotswanaPost e tlaa ntsha P100 000 go tlatsa mo kagong eo.

Mo godimo ga moo Rre Ramatlhakwane o ne a ntsha P10 000 mo kgetsing le madi a a fetang P20 000, e le koleke ya ditsala tsa gagwe.

Rre Ramatlhakwane o ne a akgola Madikwe Community Care Group a re kago e e solofetsweng e tlaa dira tiro e e botlhokwa ya go fa bagodi bonno ka jaana ba tshabelelwa ke go phuaganngwa ke bana ba heletse ba ile go batla mafulo a matalana.

Rre Jerome ‘JJ’ Ramatlhakwane, yo o kileng a tshamekela setlhopha sa kgwele ya dinao sa Zebras, o ne a kgothatsa ba ba tsereng karolo gore go botlhokwa go nna ba tsogile sentle mo mmeleng ka go itshidila mmele. A re COVID-19 e rutile Batswana botlhokwa jwa botsogo, a bo a tlatsa ka gore ba itshidile mmele le fa e le go dikologa ntlong fela.

A re go itshidila mmele go molemo ka e bile go kgona go kganela malwetse a a sa tshelanweng.

Fa a bua ka maikaelelo a motsamao, moeteledipele wa Madikwe Community Care Group, Dr Lillian Moremi, o ne a tlhalosa fa mokgatlho oo o kwadisitswe ka 2016 o itebagantse le go thusa bagodi le ba-na-le bogole. Dr Moremi a re e rile ba santse ba itlhokoletsa go tshematshema, COVID-19 ya phutlhamisa mananeo a bone mme ya re morago ba itlhotlhora lorole ba semelela. A re fa ba dira ditshekatsheko mo bathong ba ba nang le bogole mo Kgatleng, ba kopane le bone ba le 1 000 mo go ba ba 1 500 ba kgaolo yotlhe.

A re ditshekatsheko di supile fa bangwe ba tlhoka go thusiwa ka potlako. Le fa go ntse jalo a re morago ga go etela metse e le 22, mo Kgatleng, ba ne ba tlelwa ke megopolo wa go kopa setsha mme ba se fiwa ka 2022.

“Jaanong ka re na le setsha, re tlhoka madi a kago ya bonno, jaanong mogwanto o o rulaganyeditswe go kgobokanya madi.”

Dr Moremi a re karolo ya ntlha ya kago e tlhoka P1 million.

O lebogile barotloetsi ba tshwana le Pudulogong Rehabilitation Centre kwa Mochudi, I am Special kwa Tlokweng le BotswanaPost, ba a reng ba ba belege.

Motlotlegi Mabuse Pule, mothusa tona wa Lephata la Dikgaolo Ditsha le Matlo o ne a leboga BotswanaPost  hela thata.

Rre Pule, yo e bileng e le mopalamente wa Kgatleng Botlhaba, a re mogwanto oo ke sesupo sa kutlwelobotlhoko mo go ba ba tlhokileng lesego.

A re keletso ya go thusa ba ba tlhokileng lesego ke setho sa go ithaopela go fa ba bangwe seriti.

O lebogetse setlhopha seo go phuthela batho golo go le gongwe go diragatsa se se molemo, a tlatsa ka go re go gwanta go na le seabe mo go nonotsheng batho mo moweng le mo mmeleng. A re go tsamaya ke itshidilo e e botlhokwa mo go tsosoloseng mmele otlhe le go thusa kelelo ya madi.

Rre Pule o ba kgothaditse go tswelela ba kitlanye gore ba tle ba kgone tse ba batlang go di direla setshaba.

Fa a tswala tirelo, modulasetilo wa Madikwe Community Care Group, Moruti Moses Nkolonyane, o ne a leboga Dr Moremi ka toro ya gagwe e a e abalaneng le morafe.

Moruti Nkolonyane o ne a kopa botlhe go tshwaragana le go kolekela kago ya bagodi. A re o ngomolwa pelo ke ka fa setshaba se tshwarang ba-na-le bogole ka teng, mme a kgothatsa gore ba bone thuso ya potlako. BOKHUTLO