29 Jul 2024

Go supa le go somarela letlotlo la ngwao go ka ngoka bajanala le go fetlha mebereko mo lefelong.

Ka jalo motse wa Mahalapye o o humileng dingwao ka go farologana tsa merafe e e  akaretsang Bangwato, Baherero, Bashona, Barotsi, Bakalaka, Batalaote, Maxhosa le Batswapong, ba ba nang le dingwao, diteme, meaparo le dijo tse di farologaneng e ka dirisa seo go itshetsa. 

Mothusa mokwaledi (DPS) mo lephateng la Banana, Bong le Metshameko, Rre Tebogo Matebesi o buile se kwa moletlong wa go ribolola dingwao tsa merafe e e fitlhelwang mo Mahalapye ka Matlhatso o o bidiwang, Moko Cultural Festival, ka setlhogo se se reng,  Ngwao letlotlo.

Rre Matebesi o rotloeditse tshomarelo ngwao ka mefafe e mengwe e eletsa go itse ka bone, mme seo se ka tsenyetsa letseno a ba ka tlhabololang motse wa bone ka one. 

O ba kgothaditse go kwadisa dikomiti tsa mekgatlho ya bone tse di batlang go supa le go bontsha lefatshe dingwe tsa dingwao tsa bone a re lephata le ikemiseditse go ba ema nokeng ka tsotlhe.

Rre Matebesi o kaile ka moletlo wa dithubaruba kwa Molepolole, o o thusang gore go nne le tswelelopele ya ngwao, go e godisa le go e tsosolosa, a tlatsa ka gore ngwao e tshwanetse go bolokwa gore dikokomane tse di tlang di e fitlhele.

Kgosi ya Mahalapye ebile e le mothusa modulasetilo kwa ntlong ya dikgosi, Kgosi Tshipe Tshipe a re ngogola fa a tsaya setilo s go etelela morafe, a ipetela tsela e a tsileng go tlhabolola motse wa Mahalapye ka teng mme nngwe ya tsone e le go ribolola dingwao tse di fitlhelwang mo motseng.

Kgosi Tshipe le mophato wa gagwe wa Makobamotse ba ikemiseditse go kopanya morafe ka go supa dingwao tsotlhe ka moletlo o tshwana wa `Moko Cultural festival wa ngwaga le ngwaga.

O boletse fa ba dira thata le dikgotla tsa Botalaote, Konyana, Herero le Xhosa tse di mo Mahalapye.

Kgosi Tshipe a re  Mahalapye o tlholegile fa thabeng e e bidiwang Moko, selo se se tsetseng leina la Moko Cultural Festival.

A re ba batla go aga lefelo la dijo fa thabeng eo, le go tlaa apeelwang dijo tsa netswana fela.

O boletse gape fa ba tlaa dira lefelo le go tlaa itloswang bodutu.

A bo a re melatswana e e bonwang teng e tlaa dirwa matangwana a batho ba tlaa dirisang mekoro go itlosa bodutu.

Go tlaa dirisiwa thaba eo go itshidila mmele le gore btho ba t;e go palama dipitse le dikuta mme ba tsenye madi.

Modulasetilo wa komiti e e neng e baakanyetsa tiro eo, Rre Mompati Ntapu a bolela fa ba batla go fetola motse wa Mahalapye ka go dira ditiro tse di kgathisang ka ngwao ba thama mebereko.

A re se se tlaa thusa banana go ikgaphe mo ditirong tsa borukutlhi jo motse wa bone o balelwang mo metseng e e apesitsweng kobo letshoba nke borukutlhi.

Rre Ntapu a re Mahalapye o humile dingwao tse di ka humisang lefatshe la Botswana, a tlatsa ka gore badiragatsi ka bontsi mo lefatsheng leno ba tswa Mahalapye mme ba batla gore ka ditalente tsa bone ba beye Mahalapye mo mmepeng.

O boletse fa ba dira thomo le toro ya ga Kgosi Tshipe.

Kwa moletlong oo merafe e ne ya supa kapari, dijo, puo le ditsamaiso tsa merafeya bone  ka farologaneng.

Ba supa patlo le go baya botsetse. BOKHUTLO