29 Jul 2024

Seopedi e bile e le mokgothatsi, Dr Taolo Moshaga o kopile dikgosi kwa Serowe go letlanya morafe wa Bangwato.

Dr Moshaga o buile se kwa phuthegong e a neng a e tshwere le magosi a Serowe ka Labotlhano a re ba tlise kagiso le ledula mo motseng.

Phuthego e, e ne e le go ba lebogela tirisano mmogo mo tirong ya go rapelela lefatshe, e a kileng a e rulaganya le dikereke ka go farologana kwa motseng oo.

A re o tswa kgakala a itse fa Bangwato e le batho ba ba ratang kagiso go simolola ka tautona wa ntlha, Sir Seretse Khama.

A re bantshe dilabe tse di  fa gare ga morafe gore o nne ka kagiso e ba itsegeng ka yone.

Dr Moshaga o kgothaditse gore bogosi go kitlana, go bereka ka bongwefela jwa pelo, go na le therisano gore dilo di tsamaya sentle kwa Gammangwato.

A re morafe ga o a tshwanela go tshelela mo letshogong mme ba nne ka phuthologo mo motseng wa bone. 

O ba rotloeditse go bereka ka mowa o le mongwe le mothusa kgosi wa GaMmangwato, Kgosi Serogola Seretse. 

A re dithata tsa dikgosi di ka aga setshaba se se kitlaneng.

Kgosi Seretse o tlhalositse fa go nna le lerato le boammaruri go isa lefatshe kwa pele mme a leboga maiteko a ga Dr Moshaga a go dira diphetogo kwa Serowe, a re o jwadile peo e e molemo.

A re Modimo o ba eme nokeng mo dikgwetlhong tsotlhe tse di ba emang pele.

Kgosi Seretse o kgothaditse banni go fetola ka fa ba ntseng ba dirang dilo ka teng go gatela pele a bo a supa fa a tshwenngwa ke dintsho tse di bakwang bogolo ke borre. BOKHUTLO