03 Jul 2024

Setlhopha sa bomme ba Motokwe se se itsegeng ka leina la Somarela Matlakala, se ne se lakasela kwa ditshupong tsa Motokwe ka mafelo a beke jaaka maloko a ne a supa botswerere jwa go bopa dinkgo ka pampiri.

Fa a bua le BOPA, leloko la setlhopha seo, Mme Ketlhoelwang Moreki o boletse fa ba bone go le maleba go tlhama setlhopha gore ba dirise pampiri e e neng e le ntsi e bile e leswafatsa tikologo.

Ba ne ba eteletswe pele ke bomme Duduetsang Moreki le Dorah Molematsela. Mme Moreki are puso e tsweletse ka go nonotsha bomme le go ba kgothatsa go bula dikgwebo, ka jalo ba bona go bopa dinkgo e le one monyetla wa go dira jalo.

A re le fa kgwebo e le thata e na le dikgwetlho, ga ba ise ba akanye go ineela.

O tlhalositse fa dinkgo di dirwa ka sekgobokgobo sa pampiri e e bodisitsweng.

Mme Moreki a re ba dira gore di seka tsa bola thata tsa tloga tsa ba nkgela mme ba palelwa ke go bopa ka tsone.

Mme Moreki a re ba dira dibopiwa tse di farologanyeng tsa ntlo tse e reng di sena go oma ba bo ba di goba ka mmu gore di lebege jaaka dinkgo tsa letsopa.

E setse e le ngwaga wa boraro Somarela Matlakala e ntse e isa dinkgo kwa ditshupong tsa temo-thuo kwa Motokwe, mme bomme ba, ba re ba itumelela thotloetso e ba e bonang.

Ba re le fa go ntse jalo ba tlhoka go sugwa mo go direng dinkgo ka pampiri gore ba phomelele le go feta.

Mme Moreki a re Somarela Matlakala e ikaelela go atolosa tse ba di bopang e seng go ikganelela mo go bopeng dinkgo go ya go ile ka go na le go dirisa dilo tse dingwe di tshwana le ditsiri le galase, mme a re go re ba kgone ba tlhoka madi le botsipa jo bo rileng.Ba re jaanong ba itlhokoletsa go tsenelela ditshupo tsa temo-thuo tsa Ghanzi tse di tlaa tshwarwang mo bogaofing.  BOKHUTLO