02 Jul 2024

Pitse ya Montana Sky ya ga Rre Joo Raman go tswa kwa Tsabong e ikgapetse sekgele sa lebelo le leele la 2 400 metres la Thorough Bred, kwa mabelong a dipitse kwa Motokwe ka mafelo a beke.

Pitse eo, e e neng e palangwe ke mong wa yone , e ne ya a afa babogedi se ba neng ba se emetse ka jaana e rile e somoga mo gare ga tse dingwe lebala la sala le dumaduma.

Montana Sky e ne ya longwa serota ke Secretariat ya ga Rre Timon Kelebeng go tswa kwa Motokwe, e e neng e palangwe ke Isaac Vansal, mme maemo a boraro a ne a tsewa ke Salvano ya ga Rre Jean Pierre go tswa Ghanzi. Maemo a bone a gapilwe ke Silver Sky ya ga Rre Gotlhophamang Alone go tswa kwa Takatokwane.

 Mo lebelong la Thorough bred la 1 600 metres, maemo a boraro a tserwe ke Montana Sky a ipoeletsa. Mo lebelong la 1 200 metres la Thorough Bred, Last Storm ya ga Rre Jean Pierre go tswa kwa Ghanzi, e e neng e palangwe ke Thuto Xhanqare e ne ya gapa maemo a ntlha, maemo a bobedi a ne a tsewa ke Prince ya ga Rre Zara Hansa go tswa kwa Kanye, e palangwe ke Rre Kitso Sesipi, maemo a boraro a ikgapelwa ke Perfectly Put ya ga Rre Bakang Babeile go tswa kwa Draehoek fa maemo a bone a ne a tsewa ke King Dups ya ga Rre Kabo Medupe go tswa Kokotsha. 

Mo lebelong la Tswana Breed la 1 000 metres Johnson ya ga Rre Amos Motsumi go tswa kwa Lorolwane, e ne ya gapa maemo a ntlha, maemo a bobedi a ne a tsewa ke Amarula ya ga Rre Thabang Leselwa go tswa kwa Barolong Farms, maemo a boraro a tsewa ke Smallboy ya ga Rre Kenneth Oaitse e ntse e tswa kwa Lerolwane.

 Silver Sky e ne ya ipoeletsa fa maemo a bobedi a tsewa ke Western Bypass. Secretariat e boile ya ipoa kgatsu mo lebelong la 1 400 metres la Thorough Bred, maemo a bobedi a gapiwa ke Sea Ways ya ga Rre Pasela Mothibi go tswa kwa Ghanzi, fa maemo a boraro a ne a gapiwa ke Salvano le yone e ipoeletsa. 

Lebelo la 800 metres la Tswana breed le ne la gapiwa ke Johnson e ipoeletsa, maemo a bobedi a tsewa ke Smallboy ya ga Rre Thabang Leselwa go tswa kwa Lorolwane fa maemo a boraro a gapilwe ke Grasppera ya ga Rre Nash go tswa kwa Nakalakgama. 

E ntse e le gone mo lebelong la 800metres la Thorough bred pitse ya Dessert Dups ya ga Rre Medupi e ne ya gapa maemo a ntlha, fa Boisterours Baddy ya ga Rre Alone e tsere maemo a bobedi mme Last Storm ya ga Rre Jean Pierre go tswa kwa Ghanzi e tsere maemo a boraro. BOKHUTLO