12 May 2024

Mapodisi a Molepolole ba re ba tshwenngwa ke dipolaano tsa marato tse di tsweletseng ka go golela pele mo kgaolong ya bone ya sepodise.

Fa a bua mo potsolotsong ka Labotlhano, Assistant Superintendent Motshwari Mokamogo a re ba tlhotlhomisa tiragalo e mo go yone rre mongwe wa kgotla ya Mokgalo kwa Molepolole a gapetseng  mme wa dingwaga tse di masome a mararo le bobedi botshelo, a bo a gobatsa rre yo o dingwaga tse di masome a mane le bobedi mme morago a ikgapela botshelo kgwedi eno e le boferabongwe.

Assistant Superintendent  Mokamogo a re e ne ya re makuku a Labone ba amogela pego ya gore mme mongwe kwa kgotleng ya Senyedimane kwa Molepolole o rapaletse  fa thoko ga tsela, go supega fa a na le dikgobalo. A re mapodisi ba ne ba tsibogela seemo seo, mme ba ragosetsa mme yoo kwa kokelong ya Scottish Livingstone kwa go fetilweng ga tlhomamisiwa fa a tlhokafetse, fa wa rre ene a ne a alafelwa dikgobalo mme a gololwa. 

Assistant Superintendent  Mokamogo a re ba ne ba bolotsa letsholo la go batla mmelaelwa mme ba fitlhela a setse a ikgapetse botshelo mo ntlong e a neng a nna mo go yone kwa kgotleng ya Mokgalo.

O ne gape a tlhalosa fa ditopo tse ka bobedi di santse dile mo diatleng tsa sepodisi go tlhatlhobiwa ke ba bongaka.

Assistant Superintendent Mokamogo o rotloeditse setshaba go nna ba kopa dithuso tsa bogakolodi le tshidilo maikutlo fa ba gateletswe ke diemo.

O tsweletse a tlhalosa fa ofisi ya bone e na le lekalana le le haphegileng le le itebagantseng le kgokgontsho ya bong le tshidilo maikutlo, ka jalo a kopa setshaba go e  dirisa.

Mo go tse dingwe a re ba tlhotlhomisa tiragalo e mo go yone mosetsana wa dingwaga tse di lesome le boferabongwe wa kgotla ya Magokotswane a neng a ikgapela botshelo. 

A re setopo sa mosetsana yoo se emetse go tlhatlhobiwa ke ba bongaka. BOKHUTLO