09 May 2024

Banni ba motse wa Mokatse ba kopile puso go tsibogela kgang ya bone ya molwelwane wa metse ya Mokatse le Modipane.
Mo phuthegong ya kgotla e e neng e buisiwa ke mopalamente wa kgaolo ya Mochudi Botlhaba, Rre Mabuse Pule ka Labobedi, ba boletse fa motse wa bone o le ka fa mosing ka jaana o golaganngwa le wa Modipane.

Kgosi ya motse wa Mokatse, Kgosi Keabetswe Molefe o boletse fa go akarediwa ga Mokatse mo Modipane go kgoreletsa ditlhabololo go goroga kwa motseng wa bone.
A re ba ngongoregela go bo dipalo tsa batho ba Mokatse di tsentswe mo motseng wa Modipane ka palo-batho e e fetileng, ka jaana ditlamelo tsa puso le ditlhabololo di sekamela kwa Modipane.

A re kgang e, ga e ba jese diwelang ka jaana motse wa Mokatse o na le dipalo tse di kwa godimo, tse di ka thusang puso go ba akanyetsa mo ditlhabololong.
Le fa gontse jalo, Kgosi o kgothaditse banni gore ba seke ba fela pelo ka kgang e, a bolela fa ntwa kgolo e le ya molomo.

Fa a tswa la gagwe, Mopalamente Pule, yo e bileng e le mothusa tona wa lephata la dikgaolo le tlhabololo magae, o boletse fa kgang ya molelwane e santse e le kwa bogosing. A re banni ba tla a itsisiwe ka tshwetso e e tserweng mabapi le gore metse e mebedi eo, e kgaogana fa kae.

O kopile banni go dirisa mananeo a puso go tokofatsa matshelo a bone le go direla Batswana ba bangwe diphatlha tsa mebereko. A re puso e tshwere ka natla go thusa Batswana ka mananeo a a ka thusang Batswana go ipelega.
Rre Pule o gateletse botlhokwa jwa go dirisa mananeo, a tlhalosa fa go ikaega ka mananeo a nakwana go ka seka ga isa lefatshe la Botswana gope.

A re mananeo a tshwana Chema Chema, Temo letlotlo le Thuo letlotlo a ka tsholetsa dikgwebo tsa Batswana.
 Mopalamente o ba rotloeditse go ikwadisetsa ditlhopho tsa poelelo e e tlang ka kgwedi ya Motsheganong a le 20 go fitlha di 31 ka dipalo tse di kwa godimo.

Mo go tse di buisantsweng kwa Palamenteng, o boletse fa go okeditswe dikatso tsa ba komiti ya ditlhabololo tsa motse le bagodi. Bokhutlo