06 May 2024

Barui ba Tsetseng ba kgothaditswe go sirelatsa leruo la bone mo bolwetsing jwa Mokokomalo.  
Mogokaganyi wa ditirelo tsa temo-thuo mo kgaolong ya Letlhakeng, Rre Thomas Tadubana o ne a bua le barui kwa phuthegong ya kgotla e e neng e buisiwa ke Mopalamente wa kgaolo ya Takatokwane, Rre Tshoganetso Leuwe kwa Tsetseng bosheng.

Rre Tadubana o tlhalositse fa bolwetse jwa Mokokomalo (botulism) e le bongwe jwa malwetse a a  ka bakang tatlhegelo  e ntsi ka diruiwa di ka swa fa di sa alafiwe ka nako.
O boletse fa bolwetse joo bo tlwaelesegile thata fa go le  leuba ka jaana diruiwa di tshabelelwa ke go ja marapo le matlalo a diphologolo tse di suleng.

O ne a kopa barui go potlakela go sireletsa leruo la bone kgatlhanong le bolwetse joo, segolo bogolo mo pakeng eno ya leuba e go senang phulo.
A re seruiwa se se nang le bolwetse joo  se latlhegelwa  ke keletso ya go ja bojang  e bile se tshabelelwa ke go phuphama.

O ne gape a kopa barui go kentela leruo la bone dibokwana, a re ba ka dirisa molemo wa Ivemectin, mme ba tshwantse go dira jalo gararo mme morago ba tlodise dibeke tse tharo fa gare ga mekento eo.
A re go kentela dibokwana go thusa  go babalela dijo tse  seruiwa se di fulang. O ne a tswelela a kgothatsa barui  go tipa leruo la bone go le sirelatsa mo dikgofeng.
O ne a rotloetsa balemi go kgaolo letlhaka la mmidi le ise a swabe go direla diruiwa tsa bone dijo.

Rre Tadubana a re ba tshwanetse go tlogela letlhaka la mmidi malatsi a le mararo morago fa ba sena go le  kgaola gore le itewe ke phefo, mme morago ba  le dire  dingata ba bo ba le baya mo moriting gore le ome, a tlatsa ka gore le lab lab e tshwanetse ya dirwa jalo gore  e seka ya tlhotlhorega.

Mo go tse dingwe, Rre Tadubana o boletse fa mangwe a maikaelelo a lenaneo la Thuo Letlotlo e le go tokafatsa thuo le boleng jwa phulo.
A re maikaeleo magolo a lone ke go  fetola thuo go nna kgwebo ka jalo a rotloetsa bagwebi ba ba ikemetseng ka nosi  gore ba nne le seabe  mo lenaneong leo.

A re lenaneo le akaretsa go rua le kgwediso ka seatla, a tlatsa ka gore bangwe ba ka ikopanya go thusa barui ka ditlamelo di tshwana jaaka go kentela leruo. O tlhalositse gore fela jaaka Temo Letlotlo, lenaneo la Thuo Letlotlo le kgaogantswe ka barui ba babotlana le ba ba itshetletseng.

Mo go la gagwe, Mopalamente Leuwe o ne  a rotloetsa banni ba kgaolo ya gagwe go dirisa mananeo a tshwana le a Temo le Thuo Letlotlo le gone go tsaya madi a lenaneo la Chema Chema go godisa dikgwebo tsa bone. Bokhutlo