25 Apr 2024

 Go sireletsa leruo mo malwetseng go tshwanetse ga dirwa go etswe tlhoko mohuta wa mokento, selekanyo sa molemo le bokete jwa seruiwa. 

E rile a bua kwa letsatsing la balemi le le neng le rulagantswe ke ba Matlapaneng Farmers Association bosheng, modiri wa tsa matlhoko a leruo kwa Lephateng la Temo-thuo, Rre Kgotso Oteng o ne a  kgothatsa barui go ela tlhoko selekanyo sa melemo fa ba alafa leruo. 

Rre Oteng a re ba tshwanetse go dirisa bokete kgotsa selekanyo sa lebante go fopholetsa selekanyo sa molemo se se tlhokafalang mo seruiweng. 

A re gape ba tshwanetse go dirisa dikale go kala leruo. Rre Oteng o bile a tlhagisa barui gore go dirisa mokento o le mongwefela gantsintsi go ka dira gore mmele wa seruiwa o tlwaele molemo wa go nna jalo o tloge o palelwe ke go se fodisa. 

Modiri yo mongwe mo lekalaneng la matlhoko a leruo, Rre Orata Goboiwang a re barui ba tshwanetse go nna le didirisiwa tse di kalang mogote gore ba lemoge malwetse go sale gale, bogolo jang jwa metsi a pelo ka sekai sa jone sa ntlha e le mogote o o feteletseng. 

A re go alafela dikgofa go ikopantswe ke gone go motlhofo e bile go na le maduo. Molemisi wa kgaolo ya Letlhakeng, Rre Thomas Tadubana ene o ne a tlhagiso barui kgatlhanong le go sutisa leruo le lwala malwetse a tshwana le metsi a pelo. 

A re go bolaya kgofa ke selo se se molemo, mme go e nyeletsa gotlhelele go diphatsa ka jaana go ka dira gore leruo le felele le sa itsetsepele mo matlhokong.

 A re go alafela metsi a pelo le mokokomalo ka nako e le nngwefela ka jaana dikai tsa malwetse ka bobedi di a tshwana. Bokhutlo