18 Apr 2024

Modulasetilo wa khansele ya Letlhakeng, Rre Anderson Mathibe a re maemelo a dikoloi tsa setshaba a Letlhakeng a tlaa bulwa a bo a rolelwa morafe kgwedi eno e le masome mararo.

O buile se mo phuthegong ya kgotla e e neng e buisiwa ke Mopalamente wa kgaolo ya Letlhakeng, Rre Liakat Kablay ka Labobedi, morago ga gore morafe o supe matshwenyego a gore kago ya maemelo a dikoloi tsa setshaba a sa le e weditswe mme ga a dirisiwe.

Rre Mathibe o tlhalositse fa maemelo ao a dikoloi tsa setshaba a na le metlaagana e e tlaa dirisiwang ke bagwebi ba banana, a tlatsa ka gore seo se tlaa fa bangwe ba bone sebaka sa go akola lenaneo la Chema Chema le le thamilweng go thusa bagwebi ba ba botlana ka madi.

Fa a tsibogela matshwenyego a gore go lebaka khansele ya Letlhakeng e ikemetse mme e ise e nne le sekano, modulasetilo o supile fa go dirwa ga sekano go ya motsubung.

O solofeditse morafe gore ba tlaa ikitaya ka thupana gore sekano se goroge kwa bathong mo nakong e e sa fediseng pelo. Mo go tse dingwe, o ne a solofetsa morafe gore ka fa tlase ga boeteledipele jwa gagwe, ga ana go letlelela gore ditiro tsa khansele di akolwe ke dikhamphani tse di tsenang mo seatleng fela.

A re e bile o tla netefatsa gore dikhamphani tsa bana ba Letlhakeng ke tsone tse di akolang ditiro tsa khansele ya Letlhakeng. BOKHUTLO