14 Apr 2024

Modulasetilo wa khansele ya Ghanzi, Rre Jeremiah Tibi, o gwetlhile banni go phepafatsa tikologo, go fokotsa go tlhagoga ga malwetsi le go thusa go ngoka bagwebi. 

Rre Tibi o buile se bosheng fa khansele e ne e bolotsa letsholo la go phepafatsa tikologo ka fa tlase ga setlhogo se se reng: Phepafatsa Botswana. 

O supile fa ba tshwentswe ke mokgwa o sa jeseng diwelang wa banni ba ba gasagasang matlakala mo mekgwatheng le mororo go na le ditanka tse go latlhelwang matlakala mo go tsone. 

A re matlakala a a latlhelwa mo mafelong a setshaba jaaka fa go go itapolosiwang teng mo ditseleng gammogo le mo ditsheng tse di abilweng mme di ise di tlhabololwe. 

O ne a kgala mokgwa o a bo a gwetlha setshaba go fetola maitsholo ka go somarela tikologolo gore e solegele dikokomane molemo mo isagong. 

Rre Tibi o tlhalositse fa khansele e itomile molomo wa tlase go diragatsa maitlamo a go phepafatsa lefatshe ka go simolodisa phepafatso e tshwaraganetsweng mo metseng yotlhe e mo kgaolong.

 A re tiro ya go phepafatsa e tlaa tshwarwa kgwedi le kgwedi. 

O tlhalositse fa khansele e tsweletse ka go diragatsa maiteko a yone a go rotloetsa bophepa, ka go tsaya matlakala mo malwapeng le mo mafelong a ditirelo le go tlhoma ditanka tsa matlakala mo mafelong a setshaba go ralala kgaolo, go itsa go latlhelwa ga matlakala gongwe le gongwe. 

Rre Tibi o gwetlhile ba-tsaya-karolo botlhe go dira ditiro tse di tlaa tokafatsang bophepa le tshomarelo tikologo, a supa fa tikologo e e leswe e paledisa maiteko a puso go ngoka bagwebi le babeeletsi mo lefatsheng leno. 

A re ba tlaa tswelela ka go ruta setshaba ka methale e e siameng ya go somarela matlakala. Rre Tibi a re go a swabisa fa khansele e leka mme ba-na-le seabe bangwe bone ba nna maoto a tshupa go diragatsa le go tsenelela dithuto tsa tshomarelo tikologo mme a re seo, se felela se paledisa maiteko a bone a go lwantsha matlakala mo kgaolong. 

A re go tlhoka go tsibogela dithuto tseo, go ka baya matshelo a batho, diphologolo le dimela mo diphatseng ka di tlaabo di tshelela mo tikologo e e kgotlhelesegileng. 

Go tlhagoga ga malwetsi le dintsho ntateng ya tikologo e e kgotlhelesegileng o kaile fa go ka nna le seabe mo go phutlhameng ga seemo sa itsholelo ya lefatshe, segolo bogolo makalana a ikaegileng ka tsa tikologo. 

Mokwaledi wa Khansele ya Ghanzi, Rre Samuel Aron, ene o tlhalositse fa letsholo la Phepafatsa Botswana le simolodisitswe semmuso ka kgwedi ya Mopitlo mme le itebagantse le Motswana mongwe le mongwe go inaakanya le ba na-le-seabe ba bangwe, go netefatseng gore ba tshwaraganela tiro ya go phepafatsa kgaolo tsa bone. 

Rre Aron o supile gape fa letsholo le le gwetlha mongwe le mongwe go fetola maitsholo ka go dirisa matlakala go dira letseno la madi gammogo le go ithusa ka fa ba a latlhang ka teng go babalesegile. O supile fa ka seemo sa matlakala se sa jese diwelang, khansele e tlaa tlamega go sekaseka melao ya yone, go bona gore fa go tlhokafalang teng ba gagamatse setoropo, fa Kgosi Annah Rankho e ne a gwetlhile setshaba go tsaya maikarabelo ka matlakala. 

A re mafatshe a mangwe a ipela ka bophepa ka jalo o gwetlhile banni ba Ghanzi go nna sekao le bone. O ba gwetlhile go tsenelela le go diragatsa dithuto tse ba di neelwang ke ba khansele le makalana a mangwe a a itebagantseng le tsa tshomarelo tikologo. 

Kgosi Rankho, o gwetlhile khansele go etela Namibia, go ya go tsaya malebela mme ba tle go lekeletsa methale ya baagisanyi ka kwano go fetola seemo sa matlakala mono. BOKHUTLO