21 Mar 2024

 Mapodisi a Gumare a tlhotlhomisa tiragalo e banna ba ba supa ba tshwerweng ka nama e  go belaelwang e le ya nare.

Makuku ka nako ya bongwe, kgwedi eno e le lesome le botlhano, mapodisi a Gumare a ne a kopana le koloi ya modiro wa Mazda Demio e kgweediwa ke rre wa dingwaga tse masome a mane. 

Mo go phuruphutsheng koloi eo ba fitlhela nama kwa mapegelong a dilwana.

Mo potsolotsong le BOPA ka Laboraro, mogolwane wa mapodisi a Gumare, Superintendent Chenamo Orateng a  re fa a botsolotswa ke mapodisi, rre yoo o ne a tlhalosa faa filwe nama eo kwa Tubu.

Supt Orateng a re go belaesega fa nama eo e le ya nare e bile go belaesega e tswa kwa lefelong la diphologolo la NG26.

Are mapodisi a ne a ya kwa NG26 kwa ba fitlhetseng go supafala fa go bolailwe dinare tse pedi ka go fitlhetswe matlalo le ditlhogo tsa tsone.

A re ditlhotlhomiso di tsweletse, a kaya  fa borre ba o ba ka nna ba lebisiwa molato wa go tsoma ba sena teseletso.

Supt Orateng o ne a re setshaba se tshwanetse go emela nako e e tshwanetseng ya go iteka lesego go ka nna bafenyi ba go tsoma diphologo ka fa molaong.

A re lefelo la diphologolo la NG26 le diretswe terata go thibela motsamao le go itsa go anamisa bolwetse jwa tlhako le molomo go tswa diphologolo tsa naga go tsena  leruo. Bokhutlo