18 Mar 2024

Ba Lekgotla la baruti la Letlhakeng ba rapeletse baithuti ba sekole sa Mphuthe kwa motseng oo, ba ba wetsweng ke seru sa bolwetse jwa go roroma.

E rile a lekodisa batsadi, modulasetilo wa komiti ya Batsadi le Barutabana kwa sekoleng seo, Rre Marks Mokhowe, a supa fa sekole sa Mphuthe se na le dikgwetlho tse dintsi.

Rre Mokhowe o supile fa dingwe tsa dikgwetlho tsa sekole seo e le bolwetse jwa go roroma ga bana, a supa seemo se simologile ka ngwaga wa 2020 ba sena go amogela bana ba le babedi ba ba neng ba tswa kwa sekoleng sa Lempu kwa Salajwe ka one mathata a go roroma.

O tlhalosistse fa e rile ba bona seemo seo ba lekodisa bogogi jwa motse. A re le ntswa bolwetse bo ne bo ntse bo le teng nako yotlhe, monongwaga bo ne jwa tsaya phekelo e sele.

Modulasetilo o supile fa seemo se, se gwetlhile bogogi jwa motse le batsadi go rapedisa sekole.

Mogokgo Rre Alferd Ranko, o supile fa e rile a simolola tiro kwa sekolong seo, a kgatlhantshiwa ke seemo sa go roroma ga bana, tiragalo e e neng e le lantlha a e bona. O tlhalositse fa maikaelelo a gagwe e le go tokafatsa maduo a baithuti, mme go le botlhokwa go fedisa seemo se go re bana ba kgone go ithuta ba sa kgoreletsege.

Rre Ranko o supile fa a fitlhetse bana ba le barataro ba lwala bolwetse jwa go roroma mme ba oketsega go nna masome a mararo le bone, a supa fa bana ba ba amegileng e le ba metse ya Ditshegwane le Malwelwe.

O tlhalositse gape fa mo nakong ya gompieno go na le bana ba le masome a mararo ba ba santseng ba tlhasetswe ke bolwetse jo. 

O tlhalositse fa bana ba supa fa ba tshwarwa ke bogatsu e bile ba tlhalosa fa thapelo fela e le yone e ka ba kgonang.

O boletse fa ba botsogo ba supile fa go sena kalafi ya bolwetse jo, mme bomankge ba tsa botsogo ba tsere bana madi go ya go a tlhatlhoba go bona gore matsapa di a tsaya kae.

Erile a ntsha la gagwe mothusa kgosi ya Letlhakeng Kgosi Tumelo Puleng, o ne a supa fa go ntse go na le go supasupana ka menwana ga batsadi, bana le barutabana ka ntlha ya maduo a a kwa tlase a sekole seo.

Kgosi Puleng o ne a kopa go re ba tshwaragane go re maduo a bana a tle a fetoge.

Erile a leboga, mokhanselara wa kgaolo ya Borwa Rre Mothusi Ramogolane a kopa ba makgotla go tswelela ba rapedisa bana kwa dikerekeng. BOKHUTLO