27 Feb 2024

Kereke ya Guta Ra Mwari e dumela mo go ageng  ngwana wa popego e e eletsegang gore a tle a nne le boikarabelo isago.

Ke ka moo kereke eo e nnang letsatsi la banana go ba rutuntsha  le go ba fa maele a botshelo, go tsepama.  

Mafoko ao a builwe ke Modulasetilo wa kereke  eo  mo Botswana, Evangelist Letlole  Mosielele kwa  Lobatse ka Tshipi.

O tsweletse a re tumelo ya kereke e, ke go aga ngwana  wa mosimane le wa mosetsana gore nako e ba  tsenang mo lenyalong  ba bo  ba tletse e bile ba le phepa,  selo se se ka thusang gore ba age malwapa a mantle a a eletsegang.

A re e le kereke go na le ka fa ba lebeletseng kgolo ya banana ka teng go re ba tswelele  ba ikgaphile.

Evangelist  Mosielele a re mo malatsing a gompieno  bana le batsadi ga ba utlwane sentle, banana ba lebaganwe ke dikgwetlho mme maikaelelo a kereke ke go aga le go ba tsholetsa go nna batho ba ba faphegileng mo dikarolong tsotlhe tsa botshelo.

Constable Boitshoko  Ramontsho go tswa kwa  Woodhall CID o gwetlhile banana ba kereke eo go  tswelela ba itshwere  sentle,  jaaka  kereke  e ba godisa go nna le boikarabelo,  ba seka ba inaakanya le dilo dingwe tse di ka ba senyetsang bokamoso.

O ne a ba gakolola gore ba   tswe mo dikgatlhegong tse di sa siamang kana ba nna mo botsalanong  jo bo sa siamang, ka go ka ba kgoreletsa   go betla  botshelo jwa bone.

Constable  Ramontsho o boletse  gore modira molato o tsewa menwana mme menwana eo e nne  ya sennela ruri e bo e ba senyetsa bokamoso.

O ne a tlatsa ka go re toropo ya Lobatse e na le kgwetlho ya tiriso ditagi, a ba gakolola  go ikgapha mo tirisong ya tsone ka jaana di tlhakatlhakanya matshelo a bone, bangwe ba felela ba lwala tlhaloganyo.

O boletse gore dikokelo  le dikgolegelo di tletse ka batho ba ba amilweng ke ditagi.

Constable Ramontsho o tsweletse a bolela gore bana ba ima ba le bannye mme batsadi ba thuse bana go senya boimana joo, a tlatsa ka go re seo ke molato o motho a ka yang kgolegelong ya dingwaga tse di lesome le botlhano.

A tswelela a rotloetsa banana go lebagana le dithuto ka tlhoafalo, a re bogodu ga bo a siama, e bile ga bo busetse sepe, a gakolola batsadi gore ba seka ba bipa mpa ka mabele.  

O ne a kopa batsadi go lebelela le go itse metsamao ya bana ba bone.

O gakolotse banana gore ba seka ba tsena mo maratong le bagolo gore ba rekelwe tse ba di eletsang.

A re go dira jalo ke go itshenyetsa  bokamoso.

Rre Waja Dambe go tswa kwa  BOSSASNET a re  motho yo o batlang go tlogela  tiriso  ya ditagi o tlhoka kemonokeng ya ba lelwapa, a bolela gore go botlhokwa gore motho a nne le yo a buang le ene ka seemo seo.

O ne a tlatsa ka go re baithuti ba ka  thusiwa ke barutabana ba bogakolodi mo dikoleng kana go kopa thuso kwa makalaneng  a tshwana le la botsogo.  BOKHUTLO