01 Feb 2024

Monna mongwe wa dingwaga tse di masome a mararo le bobedi o fitlhetswe a akgega mo setlhareng kwa morakeng gaufi le Maubelo mo Kgaolong ya Tsabong.

Tiragalo eo e begetswe mapodisi ke mofeti ka tsela kgwedi eno e le masome a mabedi le boferabongwe maitseboa.

Go ya ka mookamela mapodisi a Tsabong Superintendent Christopher David, mapodisi ba ne ba ragogela kwa lefelong la ditiragalo,  mme ba feta ba isa monna yoo kwa kokelong ya Tsabong kwa ba bongaka ba fetileng ba rurifatsa fa a setse a tlhokafetse.

O ne a tswelela ka go tlhalosa fa moswi a le mo setsidifatsing mo kokelong ya Tsabong mme e tlaa re mo bogaufing a romelwe kwa kokelong ya Princess Marina kwa Gaborone go ya go tlhatlhojwa ke ba bongaka.

Fa ditlhotlhomiso tsa mapodisi tsone di santse di tsweletse mabapi le se se ka tswang se bakile tiragalo eo.

Mookamela mapodisi a Tsabong o ikuetse mo setshabeng go emisa mokgwa wa go ikgapela botshelo. 

A re tlogela ba malapa a bone ka kutlobotlhoko le bohutsana, mme a gakolola setshaba go kopa dithuso mo go ba ba lebaneng ba akaretsa baruti, magosi, mapodisi, ba boipelego, batsadi le ditsala tsa bone go rarabolola dikgang tsa bone ka jaana molemo wa kgang e le go buiwa.

O boletse fa moswi a tlholega kwa Maubelo mo kgaolong ya Tsabong mme a ne a sa tlogela mokwalo ope mabapi le se se ka tswang se mo tshwentse mo maikutlong. 

Supt David o boletse fa ngwaga oo fetileng ba gatisitse ditiragalo tsa go ikgapela botshelo di supa mo go tsone borre ba le batlhano le bomme ba le babedi fa ngwaga ono e le ya ntlha.

Mookamela mapodisi a Tsabong o ne a tlatsa ka go gakolola bogolo jang borre le setshaba ka kakaretso go tsaya lenaneo la ga Tautona Dr Mokgweetsi Masisi tsia la go fetola dikakanyo, megopolo le maikutlo ka seo se ka thusa mo go nyeletseng gotlhelele dikgang tsa go ikgapela botshelo. Bokhutlho