25 Jan 2024

Banni ba Sepopa ba gwethilwe go nna le seabe mo go tlhabololeng motse wa bone. 

Mopalamente wa Okavango, Rre Kenny Kapinga o ba rotloeditse mo phuthegong ya kgotla ka Labobedi.

Rre Kapinga o supile fa motse o saletse morago ka ditlhabololo mme o tlhoka ditiro tse di ka tsholetsang itsholelo ya one.

A re go tlhoka ditlhabololo go baka gore banni ba hudugele kwa metseng e e mabapi jaaka Shakawe.

Rre Kapinga a re o tshwenngwa ke go re ditiro dingwe tsa puso tse di filweng dikhamphani tsa Batswana ka maikaelelo a go rotloetsa beng gae di sa fele ka nako. A re le fa puso e rotloetsa beng gae, go botoka go re e fe dikhamphani tse di nang le motlhala wa go dira sentle tiro.

A re o tshwenngwa ke go bo tsela ya Sepopa-Mohembo e e neng e tshwanetse go simolola go baakangwa ngwaga o o fetileng e saletse kwa morago mme banni ba kgaolo eo ba sa rerisiwe go re go bakwa ke eng ka e bile ba ne ba solofetse go re banni ba Sepopa le metse e e mabapi ba tlaa bona ditiro le itsholelo ya motse e tlaa tokafala.

Rre Kapinga o gakolotse barui go tlhokomela leruo la bone gore le ba tswele mosola ka ba Botswana Meat Commission ba okeditse ditlhotlhwa tsa theko ya kgomo.

A re fa barui ba disa leruo la bone e bile ba le tlhathela, go ka fokotsa bogodu jwa lone.

Rre Kapinga o ne rotloetsa banni ba go ikwadisetsa lenaneo la Temo Letlotlo le le thusang ka didirisiwa tse di tlhofofatsang temo jaaka diterekere tse a reng di kaba thusa thata go na le go lema ka ditonki.

Fa a bua mo boemong jwa modulasetilo wa komiti ya ditlhabololo tsa motse ya Sepopa, Rre Baisang Kodumo o ne a re ba tshwentswe ke kago tsa pelegi tse di agilweng mo motseng wa bone mme di ise di tsenngwe mo tirisong.

Rre Kodumo a re ba sa le ba solofeditswe di ofisi tsa dikgolegelo le di ofisi tsa sepodisi tse di tlang ka koketsego ya mapodisi a tlhalosa fa mapodisi a motse wa bone a okametse kgaolo e e bophara ya Sepopa le metse e e mabapi.

O tsweletse gape a re ba kopa go agelwa diofisi tsa ba diphologolo ka motse wa bone ole motona e bile o na le metsana e e ikaegileng ka one, a re seo se ka fokotsa mosepele wa go kopa dithuso kwa Shakawe. Bokhutlo