23 Jan 2024

Ba National Development Bank ba mo loetong la  kgaolo ya Chobe Enclave  go fa banni ba metse ya go simolola kwa Mabele go tsena Parakarungu dithuso tsa lenaneo la Temo Letlotlo.

Banni ba boleletswe ka loeto la ba banka ke molemisi mogolo wa Chobe, Mme Mogolo Simon kwa phuthegong ya kgotla kwa Satau e e neng e buisiwa ke Mopalamente wa Chobe, Rre Machana Shamukuni bosheng.

Rre Shamukuni o rotloeditse balemi go iketleetsa go tla go kopa thuso. O tlhalositse go re NDB e thusa ba ba ba nang le letseno le le fetang P4 000 mme a kopa balemi ba ba botlana ba letseno le le kwa tlase ga P4 000 go ikgolaganya le ofisi ya balemisi kwa Satau.

Mme Simon o tlhalositse go re le fa konteraka ya pereko ya molemisi wa Satau e wetse bosheng, ba rulagantse le balemisi ba metse e e mabapi go thusa kwa Satau le Parakarungu.

O supile fa kwa Satau go ikwadisitse balemi ba le 74 mme ba le 39 e le ba ba thusiwang ba sa duele sepe fa ba le 35 e le ba kadimo ya madi kwa NDB.

Mme Simon a re temo ya Chobe Enclave e pharologanyo  fa go tshwantshangwa le mafelo a mangwe ka ba lema fa letshitshing la noka ya Chobe kwa metsi a sa kgaleng. A re balemi bangwe ba Molapo Farming ba simolola go lema ka dikgwedi tsa bo Lwetse mme ba robe dijwalo tse di ntsi.

Mme Simon a re bontsi jwa balemi ga ba a agelela masimo, ba supa fa diphologolo di senya terata mme ba tlhalositse fa ba a tlhokomela ka go a disa bosigo le motshegare. Mopalamente Shamukuni o supile fa a itumeletse go bo selelo sa kgaolo ya Chobe go tlhoka dithuso tsa NDB se arabilwe ka banka e dirile thulaganyo ya go isa bodiredi kwa bathong.

O kopile banni go nna pelotelele ka lenaneo le santse le le lesha mme e tlaare dingwaga di tsweletse ba le tlwaele.

“Lenaneo la Temo Letlotlo le diretswe gore Batswana ba le akole ba kgone go lema e bile ba ijese ka jalo, ke kopa le ikatumetse kwa ofising ya balemisi le botse, le tseye lenaneo le,” Rre Shamukuni a supa.

A re banni ba Satau ba lesego ka go bo ba lema fa nokeng e e sa kgaleng mme a ba kgothatsa go re ba inaakanye le lenaneno la temo ya nosetso go re ba leme go le go ntsi.

Kgosi Rungwe Simasiku o kopile ba lephata la Temo Thuo go buisa diphuthego go ruta batho ka Temo Letlotlo.

O tlhalositse fa Molapo Farming e atlegile thata mo Chobe Enclave ka go bo ba lema mo meseleng ya noka ya Chobe, mo go ba thusang  go bona thobo e namagadi.

Kgosi Simasiku o kopile Lephata la Temo Thuo go tsibogela kgang ya go tlhoka balemisi a bo a kopa go re go thapiwe balemisi ba sennela ruri go itsa makgwere bogolo ka nako ya temo. BOKHUTLO