22 Jan 2024

Matshwititshwiti a ne a tshologetse kwa Kang ka Matlhatso, go boloka Mme Keorapetse Seipone, Mohumagadi wa ga moswi Kgosi Churchill Seipone.

 Mohumagadi Seipone o tlhokafetse kgwedi eno, e tlhola malatsi a le lesome mo Gaborone, morago ga go lwala ka lobakanyana.

Dibui ka go farologana di supile fa Mme Seipone e ne e le sekgantshwane mo motseng.

O tlhalositswe fa a ne a le tlhaga mo ditirong tsa kgotla ya Gamonyemane le motse wa Kang ka kakaretso.

Go tlhalosiwa fa a ne a nna le seabe mo tshimolodisong ya mokgatlho wa sefapaano se sehibidu,  a bo a tlhophiwa moeteledipele wa mokgatlho.

Ka ntlha ya bonatla le mowa wa boithaopo, o ne a tlhophiwa go nna motshwaramadi wa komiti ya batsadi le barutabana kwa sekoleng se se botlana sa Kang ka lebaka le le leele.

Mohumagadi Seipone o ne a nna le seabe mo tshimolodisong ya komiti ya ditlhabololo tsa motse, mme e ntse e le ka boineelo, bopelontle le bogakolodi a tlhophiwa go nna moeteledipele wa lekgotla la bahumagadi ba dikgosi tsa Kang.

Mopalamente wa Kgalagadi Bokone, Mme Talita Monnakgotla, o kaile Mohumagadi Seipone e ne e le mme yo o tletseng lerato ebile a sa le tlhaetse ope yo a kopanang le ene.

A re ka ene e le motho yo o ratang go tsaya karolo mo dikgannyeng tse di amang ditlhabololo tsa motse, o ne a tsenelela diphuthego tsa kgotla ka dinako tsotlhe, e bile lentswe la gagwe le utlwala.

A re Mme Seipone o ne a obamela molao mme thuto eo e itshupa le mo boeteledipeleng jwa kgosi wa gompieno, Kgosi Basadi Seipone.

A re moswi o ne a tseetse kwa godimo dikgang tse di amang ngwana wa mosetsana, ka jalo a nna a gakolola gore di sekasekwe go tsentswe leitlho le le tseneletseng go leka go tla ka ditharabololo.

Mme Monnakgotla o ne a gwetlha bana ba moswi, go tshegetsa serodumo sa batsadi ba bone, ka go ngangatlela thuto le lerato le batsadi ba ba godiseditseng mo go lone.

Moemedi wa Botswana Democratic Party (BDP), Rre Lesedi Mothibamele, o ne a tlhalosa fa Mohumagadi Seipone le mabutswa pele a mangwe a phathi, le ntswa a ne a ntsha tlhogo, a ne a le tlhaga mo mererong ya sepolotiki, ba lwela katumetso ya ditlhabololo ka jaana, di simoloseditswe mo lokgereng. A re seemo sa ditlhabololo tsa Kang se tlhotlheleditswe ke mowa wa boithaopo le lerato lwa ga mohumagadi le ba bangwe.

 Rre Masego Phorie o tlhalositse fa Mohumagadi Seipone e ne e le mme wa mmakgonthe ka kemo nokeng e a e supileng ka nako ya fa monna wa gagwe a eteletse pele morafe wa Kang.

 A re go ne go le thata, itsholelo e le kwa tlase, ditlhabololo di le boutsana mme ka ntlha ya bogakolodi jwa gagwe mo go kgosi, ba ne ba kgona go bopa ditlhabololo di tshwana le go batlela morafe metsi a a nowang le a leruo, mahudiso ga mmogo le sekole se se botlana.

Moagisanyi Mme Lemme Chabanga, o mo tlhalositse fa e ne e le mme wa tumelo, a obama kwa United Congregational Church of Southern Africa (UCCSA).

A re Mme Seipone e ne e le motho yo o pelo namagadi a sena mowa wa kgethololo e bile a rotloetsa tshwaragano ka dinako tsotlhe.

 O ne a gwetlha bana ba ga Mohumagadi Seipone, go tswelela ba tshwaragane gore ba tsweledise se motsadi a se ba rutileng gore ntlo ya bogosi e robalelwe ke ditlhokwa.

 Fa a leboga, Kgosi Basadi Seipone, o lebogile Mohumagadi wa ga Tautona, Mme Neo Masisi, gammogo le morafe ka kemo nokeng, ka nako e thata ya tatlhegelo ya motsadi wa bone.

O ne a iteela kobo moroko mafoko a dibui tse dingwe ka lerato le motsadi wa bone a neng a le fa mongwe le mongwe kwa ntle ga kgethololo.

A re e ne e le motho yo o ratang kagiso le tshwaragano tse ka tsone, a neng a ba rotloetsa go di diragatsa mo matshelong a bone.

Kgosi Seipone a re motsadi wa bone ene e le senatla, a rata bophepa, a rata therisanyo e bile a ba rotloetsa  go re ba ithute go itshwarelana fa ba nna le dipharologano.

Mohumagadi Seipone, yo o tshotsweng ka 1937, kwa Tshane, o tsene sekolo se se botlana kwa Tshane, mme a felela ka lekwalo la bone.  O tsenye mo nyalong e boitshepho le Kgosi Seipone ka ngwaga wa 1957, mme ba fudugela kwa Rooderport kwa Aferika Borwa, ka 1959 go fitlha ka 1965.

Go bolelwa fa go gorogeng ga gagwe kwa Rooderport, Mohumagadi a ne a tsenelela dithuto tsa go loga le go roka.

Mme Seipone o ne a segofaditswe ka bana ba basetsana ba le boferabobedi mme ga tlhokafala ba le babedi ka jalo, a tlogela ba le barataro, bana ba bana ba le lesome le botlhano le dikokomana di le lesome. BOKHUTLO