27 Dec 2023

Mapodisi a Molepolole a tlhotlhomisa kotsi e mo go yone batho ba le bane ba latlhegetsweng ke matshelo mo maphakeleng a  December 26.

Fa a bua mo potsolotsong le BOPA, Mookamela mapodisi a Molepolole Superintendent Jacob Molapong a re e ne ya re mo maphakeleng a Labobedi ka nako ya botlhano ba amogela pego ya kotsi mo tseleng ya A12 gaufi le bara ya The Big Six mo Mogokotswane.

A re mapodisi a ne a tsibogela seemo seo, mme a ragosetsa ba ba amegileng kwa sepateleng sa Scottish Livingstone kwa go rurifaditsweng fa ba le bararo ba sa tlhole ba le mo botshelong, mme mongwe wa ba ba amegileng a fetisediwa kwa Princess Marina Hospital kwa a tlhokafaletseng teng.

Mookamela mapodisi a Molepolole o tlhalositse fa ditlhotlhomiso di santse di tsweletswe go sekaseka se se katswang se bakile kotsi eo.

Mo go tse dingwe Superitendent Molapong a re ba tshwengwa ke go thubiwa ga matlo le madirelo mo go ileng magoletsa mo kgaolong ya bone, selo se a reng se setse se baka gore banni ba tshelele mo poifong.

Ka jalo, are seemo se sa borukuthi se ne sa ba gwetlha go nna le mapodise a tsamayang mo gare ga motse bosigo le motshegare go itepatepanya le go lwantsha borukutlhi.

O tsweletse a re le ntswa motsamao wa batho o ne wa oketsega mo motseng ka malatsi a keresemose ga go a nna le maitshwaro a eseng one ka jalo a akgolela banni ba Molepolole tirisanyo mmogo le ba sepodise go sena kgopekgopetsano.

“A re tsweleleng re itshware sentle, re obameleng matshwao a tsela le go ikgapha mo go kgweetseng re itshietse,” ga bua Superitendent Molapong.

O supile fa ba eme malala a laotswe go tswelela ba tsisa tshireletso mo motseng wa Molepolole jaaka go ipaakanyediwa ngwaga o mosha.

Le fa go ntse jalo a re e ne yare mo malatsing a go ipaakanyetsa keresemose ba amogela dipego dile nne tsa batho ba ba ikgapetseng matshelo. Bokhutlo