12 Dec 2023

Ba sepodisi sa Palapye ba tshwaragane le dikereke ba ne ba  tshwara merapelo kgatlhanong le  dikotsi tsa tsela tse di tsweletseng ka go gapa matshelo a batho mo kgaolong eo, ka tumelo ya gore ba ka fenya ka mautlwelo botlhoko a Modimo.

Merapelo eo, e ne e tsenwe ke dikereke ka go farologana le bogogi jwa Palapye  ba le bone ba tshwentsweng ke dikotsi tsa ditsela.                             

Tiro eo, e ne e tshwaretswe  fa thoko ga tsela ya A1 kwa Setatse le kwa masimong a Lechana, le ya A14 gaufi le moepo wa Morupule. 

Mogolwane wa mapodisi a pharakano kwa Serowe Assistant Superintendent Koolebogile Sefatlhi, a re ba tshwentswe ke dikotsi  tsa tsela tse di gapang matshelo a batho, fa tse dingwe di tlogela bangwe ka bogole.

Assistant Supritendent Sefatlhi a re ba bone go tshwanela gore ba kope thuso kwa modimong ka ba dumela fa thapelo e na le maatla a go fenya tsotlhe.                  

A re ba latlhegetswe ke batho ba le bantsi mo dikotsing tsa tsela a tlhalosa gore motho  fa a tlhokafala  ke tatlhegelo  e kgolo ka gore ga gona yo o ka mo emelang.                                             

Ka jalo Assistant Superintendent Sefatlhi o ne a gakolola bakgweetsi gore nako tsotlhe  ba netefatse  gore dikoloi tsa bone di itekanetse fa ba tsaya  mesepele.

A re mokgweetsi o tshwanetse a kgweetse koloi a itekanetse gore a obamele matshwao a tsela ka nako tsotlhe.                                                     

Mogolwane o ne a re ba rulagantse thapelo go lebilwe malatsi a Keresemose le Ngwaga o mosha, ka ba lemogile gore  dikotsi ka bontsi di bakiwa  ke boitumelo jo bo kwa godimo le mesepele e meleele.   

Assistant Supritendent Sefatlhi a re  ba lekile ka gotlhe mo ba ka go kgonang go thibela dikotsi  tse di tsweletseng, ke ka moo ba boneng  go tshwanela ke go bitsa dikereke  go tla go rapelela dikotsi .

Assistant supritendent Sefatlhi a re bontsi  jwa dikotsi  di bakiwa ke lebelo le le kwa godimo le maitsholo a e seng one mo bakgweetsi bangwe mo ditseleng.

O ne a kopa baruti go akaretsa masula  otlhe  a borukuthi jo  bo ileng magoletsa mo kgaolong  ya Palapye  le kgokgontsho  a tlhalosa  fa  matshelo a batho a le mo diphatseng ka lebaka la dirukutlhi tse.                                       

A re sepodisi ka nosi ga se kake sa kgona go lwantsha borukutlhi, ke ka moo ba rotloetsang mowa wa tshwaragano, neelano fa gare ga bone le morafe.                              

Mothusa Mogolwane wa mapodisi a pharakano mo Palapye Inspector Christopher Mpofu a re ba gatisitse dikotsi tsa tsela di le 467 mo ngwageng ono mo go tsone  di le 13 e le tse di  masisi.

Inspector Mpofu  a re  ka ngwaga  wa 2021 ba gatisitse dikotsi  i le  513,  ka 2022 di le 506 tse di masisi di le le borobabongwe mo ngwageng tsoo pedi .               

Mogolwane  wa lephata  la Ditsela Dipalamo le Ipabalelo mo Palapye,  Rre More Chapete  a re dikotsi tsa tsela di gaketse mme kgang e tona ke gore bakgweetsi bangwe ga ba obamele matshwao a tsela gape ga ba tlhatlhobe dikoloi tsa bone gore a di itekanetse. 

Rre Chapete a re dikoloi ga di a direlwa go bolaya mme di diretswe go thusa mesepele le go rwala dithoto ka jalo ga di dire dikotsi mme bakgweetsi ke bone ba bakang di kotsi.                                   

Rre  Chapete a re go lemosegile fa batho ba ba  amegang  thata mo dikotsing  tsa tsela e le banana.

O ne a kopa batsadi go gakolola le go lemotsha banana bodiphatsa jwa go kgweetsa ba iphitisitse dino kana dikoloi di sa itekanela. 

A re mongwe le mongwe a eme ka dinao go thusa ba molao, a tlhalosa  gore  go batla batho ba fetola boitshwaro le ka fa ba dirang  dilo  ka teng.                                                      

 Rre Chapete  a re  ipabalelo tseleng ke ya mongwe le mongwe, a tlhalosa fa go le botlhokwa gore botlhe ba tshele ipabalelo tseleng go hema dikotsi. BOKHUTLO