08 Nov 2023

Bodiredi jwa maphata ka go farologana mo kgalong ya Kgatleng bo rotloeditswe go tokafatsa maduo mo tirong go isa ditlhabololo le mananeo a puso kwa setshabeng.

Se, se builwe ke mopalamente wa Kgatleng Bophirima, Rre Mmusi Kgafela yo gape eleng Tona wa Papadi le Madirelo, fa a buisa phuthego ya kgotla kwa Mochudi bosheng.

O supile fa bontsi bo sa kgotsofalele boleng jwa ditirelo tse ba di fiwang ke maphata go ya ka pego e e ntshitsweng ke ba komiti ya ditlhabololo tsa motse.

Rre Kgafela a re ke nako ya gore babereki ba itshekatsheke ka bongwe ka bongwe go bona gore ba ka tokafatsa maduo jang.

O tsweletse a re, gore motse o nne le ditlhabololo tsa selebego se se rileng, go botlhokwa gore morafe o dirisane sentle le bodiredi ka go fetola ka fa ba ntseng ba dira dilo ka teng.

“Bagaetsho modiri yoo dirang tiro ka bonatla o botlhokwa mme yo o boitseme mo tirong o botlhabetsi ka o a bo a neetswe boikarabelo jwa tiro e a sa e direng mme a e duelelwa,” Re Kgafela a tlhalosa. Tona o kgadile batho ba ba utswang dithoto tsa puso. 

A re tomagano magareng ga morafe le bodiredi e ka fokotsa ditshenyegelo tse puso. 

Mo go tse dingwe Rre Kgafela o ne a supa fa ba tlaa tsena mo dipuisanong le mafatshe a mangwe ka tsa papadi le madirelo gore dithoto tsa Africa di rekisiwe kwa mebarakeng ya America ntle le go kgethisiwa.

A re ka bagwebi ba kokonelwa ke dituelo tse di dirwang kwa melelwaneng, dipuisano tse di tlaa ba tswela mosola mo isagong.

Fa a amogela morafe mo kgotleng ya Mosanta, Kgosi Ivor Kgamanyane wa kgotla ya Boseje o ne a supa fa ditlhabololo tsa motse di diiwa ke bodiredi jo bo boitseme mo tirong, a kaya fa puso e ntsha ditirelo le mananeo a a ka tswelang batho mosola mme selabe se tla ka baabi ba ditirelo.

O kopile morafe go dirisana le ba komiti ya ditlhabololo tsa motse go ba fa maele ka tse ba eletsang di ka dirwa mo motseng.

Kgosi Kgamanyane o kopile morafe go itlwaetsa go latlha matlakala ka mokgwa o o siameng, a re matlakala a a tshwanang  le metseto ga a tshwanela go latlhelwa gongwe le gongwe ka jaana a le kotsi thata mo matshelong a batho le diphologolo.

Banni ba ne ba lela thata ka bogodu jwa leruo jo bo diragalang, ba kopa gore sepodisi se okediwe go rarabolola mathata a. Bokhutlo