30 Oct 2023

Boeteledipele jwa kereke ya Holy Crosss Catholic le batsadi ba lebogetswe thotloetso e e tsisang phetogo mo bananeng.

Tona ya Banana, Bong, Metshameko le Ngwao, Rre Tumiso Rakgare o buile se kwa moletlong o o neng o dirilwe go kokoanyetsa khwaere ya Holy Cross Catholic Church madi morago ga gore e tseye maemo a ntlha kwa dikgaisanyong tsa moopelo tsa ngwaga le ngwaga tsa dikereke tsa Catholic bosheng  kwa sekoleng sa St Joseph’s College bosheng.

Tona Rakgare o boletse gore banana ba kereke eo ba supile botsipa le maikaelelo le ntswa go na le dikgwetlho. 

O boletse fa madi a a kgobokantsweng a tlaa dirisiwa go thusa khwaere eo go tsena dikgaisanyo tsa meopelo tsa  Interdiocess Catholic Church Choirs Music Association Festival, e e tlaa tshwarelwang  kwa Soweto kwa Afrika Borwa. 

O tlhalositse fa ofisi ya ga mopalamante kwa Mogoditshane e ne ya tshwara moletlo kwa sekoleng se se golwane sa Mogoditshane, go rotloetsa banana go ikamanya le Modimo. 

A re ngwaga o fetileng, dikereke di le lesome le bosupa di ne tsa kopana go ngoka banana le go ba ema ka lefoko go re ba itse fa dikgwetlho tse ba lebaganeng le tsone ba ka di fenya fa ba ikanya Modimo le thapelo. 

Rre Rakgare o tlhalositse fa mohumagadi wa gagwe Mme Hildah Rakgare, a solofeditse go thusa khwaere ka madi P5 000.  “Go re kereke e oketsego, dikgato dingwe di tshwanetse go tsewa ka jaana kereke e se mokgatlho wa sepolotiki, go omana, go dilolana le go tlhoka go dumedisana ga go molemo mo kerekeng,” ga bua Rre Rakgare. 

A re o buisiwa se ke gore dikereke dingwe di a thubega, a gatelela gore boeteledipele jwa kereke bo tshwanetse go nna le boikarabelo go tlhokomela maloko a kereke. O tlhalositse fa seabe sa kereke se le segolo ka jaana fa go utlwalelwa mogare wa COVID-19 kwa China ka ngwaga wa 2019, boeteledipele jwa lefatshe bone jwa baa kereke kwa pele go lwa ntsha mathata a bolwetsi joo. 

Mopalamente wa Mogoditshane o ne leboga kereke tsotlhe tsa Botswana ka go bopagana le boeteledipele jwa lefatshe, go dira ka natla go boloka matshelo Batswana. Moeteledipele wa khwaere ya kereke, Rre Koketso Mogaodi o galaleditse mafoko a ga Rre Rakgare a bolela fa ka kgwedi ya phatwe ba ne ba tsenelela dikgaisano tsa meopelo tsa kereke, mme ba gapa maemo a ntlha ka pina e e reng Part of Mass, e e rayang tlotlo mo kerekeng ya Catholic.

“Re ne gape ra opela pina ya Western e re tsereng maemo a bobedi ka yone, rebe re nna le pina ya se Africa e le yone re tsereng maemo a bobedi. Ra nna gape le pina ya solo e e neng ya tsaya maemo a ntlha,” ga bua Rre Mogaodi. O tlhalositse fa madi a a tlaa kgobokanngwang a tlaa ba thusa go tsenelela dikgaisano tse di bidiwang Interdioces Catholic Church Choirs Music Association kwa Soweto kwa Aferika Borwa.

Fa amogela baeng, Parish Priets Father Ajit a re o solofela go re khawere e tlaa dirisa dithuso tse e tlaa di bonang sentle a ba a kopa maloko a kereke go tsenya letsogo ka thata. BOPA