25 Oct 2023

Banni ba Keng ba gwetlhilwe go bega dikgang tsa bana ba ba dirisiwang botlhaswa mo go tsa tlhakanelo dikobo. 

 Motshwarelela mokwaledi wa khansele ya Mabutsane, Rre Ofentse Moatshe a re batsadi ba sekaseke seabe sa bone mo go lwantsheng kgokgontsho mo baneng.

  A re dikgang tseo di a tshwenya mo kgaolong mme gantsi ga di begiwe kwa go tshwanetseng teng.

   Rre Moatshe a re kgwedi le kgwedi ba gatisa dikgang tsa bana ba ba dirisiwang mo go tsa tlhakanelo dikobo, e bile mo bogompienong ba tshwere dikgang di ka nna masome a mane mo kgaolong ya Mabutsane ka bophara.

O buile jalo kwa phuthegong ya kgotla e e neng e buisiwa ke mopalamente wa kgaolo ya Jwaneng-Mabutsane,Rre Mephato Reatile ka Labobedi. O ne a tlhagisa banni gore go loba dikgang tsa mofuta oo ke molato o ba ka atlholelwang kgolegelo.

“Molao wa bana o tlhalosa sentle hela gore go tlhoka go bega dikgang tsa mofuta o ke molato o o tshwanetseng go tseelwa dikgato tse di maleba. A re seka ra bipa ditiro tse borre ba ba dirang, fela ka gore ba re fa sengwe mo malwapeng,” a tlhalosa. Rre Moatshe o ne a tsibogela mafoko a kamogelo a ga Kgosi Dickson Serurubele, yo o supileng fa boimana jwa banana bo ile magoletsa mo motseng. O ne a re batsadi ba bipa dikgang tseo ka mabele le ntswa bana ba dingwaga di kwa tlase ba ima.

Kgosi o tlhalositse fa ba apesitswe kobo ka letshoba ke borukutlhi le tiriso ya ditagi, bogolo jang mo bananeng.  A re e re ntswa komiti ya twantsho borukutlhi e dira ka natla go tsibogela botlhoka tsebe mo motseng, dikgang tseo di tsweletse ka go gola.

Erile a iteela moroko mafoko a ga kgosi,modulasetilo wa komiti ya ditlhabololo tsa motse, Mme Ologetswe Kelebemang a supa fa ba tlhaelelwa ke mapodisi ebile le koloi ya ofisi ya sepodisi. 

BOKHUTLO