12 Oct 2023

Bagwebi ba ba botlana ba rotloeditswe go fetola ka fa ba tsamaisang dikgwebo tsa bone ka teng gore ba bone dipoelo

Ba gaokolotswe go dirisa mananeo a a thusang dikgwebo tse dipotlana jaaka lenaneo  la Mabogo dinku go tokafatsa dikgwebo tsa bone.

Fa a bua  phuthegong ee neng e biditswe ke ratoropo wa Selebe Phikwe, Rre Lucas Modimana, mogolwane go tswa kwa Local Enterprise Authority (LEA) Mme Maitumelo Marumo a re bagwebi ba itshwaraganya le bone go ba tlhatlhelela botsipa jwa go tsamaisa dikgwebo.

Phuthego eo, e ne e itebagantse le bagwebi ba ba botlana go bona gore khansele e ka ba thusa jang go godisa dikgwebo tsa bone, kwa Selebi Phikwe ka Laboraro.

Mme Marumo o ne a rotloetsa bagwebi go ikopanya gore ba kgone go adima madi kwa CEDA, a tlhalosa fa bangwe ba setse ba akotse madi a lenaneo la mabogo dinku. 

Nngwe ya tse a di tlhalositseng ke go itlwaetsa go nna le mekwalo e e tlaa ba thusang go bona gore a kgwebo  tsa bone di dira dipoelo ka na jang.

A re kgwebo ena le dikgwetlho mme go tswa mo mogwebing gore o ikiteile sehuba go le e kafe. 

Mo godimo ga seo o gateletse botlhokwa jwa go tswakanya tse ba gwebang ka tsone eseng go rekisa selo se le sengwefela ka se, se sa supe tswelelo pele, a fa sekai sa go tswakanya merogo e e farologanyeng jaaka merogo, ditamati, green pepper le tse dingwe.

Fa Rre Modimana, a ne a tlhalosa  fa khansele e itse ka  tlhaelo  ya lefelo le ba direlang mo go lone morago ga gore ba sutele kago ya  dipalamo tsa setshaba, mme a tlhalosa fa tiro e e neng e tshwanetse go wela ka kgwedi ya Ngwanatsele mono ngwaga.

A re ntswa tiro e ne ya diiwa ke mabaka a rakonteraka a a neng a kopana le one, tsholofelo ke gore e bo e fedile ka Hirikgong ngwaga o o tlang.

Rre Modimana o ne a ba solofetsa fa ba le mo dipuisanong le ba ba maleba ka go seka seka  ditlhwatlhwa tsa marekisetso gore bagwebi le bone ba tle ba kgone go bona dipoelo.

A re maitlamo a khansele ke go isa ditlamelo tse di ka ba tokafaletsang matshelo e seng go baka dintwa.

Le fa go ntse jalo o ne a ba akgolela go bo ba tsweletse ka go tlhomamisa gore fa ba berekelang teng go nna go le phepa.

Mongwe wa bagwebi Rre Leano Kgosietsile o akgoletse puso maiteko a go tswelela thekiso ya merogo le go tswa kwa ntle go fa balemi ba  mo gae sebaka sa go  rekisa  dithoto tsa bone.

Rre Kgosietsile a re sebe sa phiri ke gore dithoto tsa mono di a tura mo go felelang go ba kgoba marapo go ka  tswelela ba le mo  kgwebong.

 O ne a re ba kgona go tsaya sebaka se se leele ba le kwa dipolaseng ba emetse go reka mme nako dingwe ba boa ba sa kgona go reka. Bokhutlo