05 Oct 2023

Banni ba Mahalapye ba rotloeditswe go tshwaragana ka seo se ka nolofatsa go tlhabolola motse wa bone.

Ba re ba ka fitlhela se ka go sala morago mafoko a ga Tautona Dr Mokgweetsi Masisi a go fetola megopolo, dikakanyo le mekgwa.

Moemela Kgosi yo mogolwane mo Mahalapye e bile e le mothusa kgosi kwa ntlong ya dikgosi, Kgosi Tshipe Tshipe o buile se mo phuthegong ya gagwe ya ntlha jaaka a ne a baya morafe pele maikaelelo a gagwe morago ga go bewa setilo kgwedi ya Phatwe e tlhola gangwe

O tlhalositse fa keletso ya ga Tautona Masisi e le gore bona lefatshe  le dule mo mo itsholelong e e fa gare, e le  lefatshe la itsholoelo e e ikaegileng ka dikitso.

A re mme o batla ba ema ka dinao go thusana go ka fitlhelela toro ya ga Tautona.

O boletse fa motse wa bone o ne o agilwe ke Trust, e o tlhabolotse mme mo tseleng e ne ya wa, a re mme boeteledipele bo nale seabe mo go weng ga yone, a tlhalosa gore Trust ke yone e ka ba thusang go baakanya dikgwetlho tse di ba lebaneng e le motse.

A re maikaelelo a gagwe ke gore Trust e tsosiwe

O supile fa motse o kile wa bo o na le ditshupo tse di neng di eletswa ke mongwe le mongwe, mme nako e gorogile ya gore di tsosolosiwe.

Kgosi o rotloeditse morafe gore o eme tsosoloso eo nokeng gore kwa bofelelong go di busetsa  mo seemong se e leng gore di ka thusa go tlhama ditiro, gape di ka thusa mo go tlhabololeng motse.

A re keletso ya gagwe ke gore ba nne le letsatsi la ngwao, ka motse wa bone o na le merafe e e farologaneng mme ba tshela mmogo, selo se se ka thusang metse e mengwe go ithuta mo go bone gore go tshidisanngwa jang go sena dikgotlhang.

Kgosi Tshipe a re Mahalapye o na le ditso tse dintsi mme di fitlhegile, a re ba batla go  ikagelo lefelo le ba ka direlang tiro ya go tsosolosa ngwao teng.

O tlhalositse fa a tsere tshwetso ya gore fa go ntseng go na le diphotlha di tswale, komiti e tona ya ditlhabololo e berekele mo kgotleng e tona ka ke yone e lomaganyang boeteledipele le morafe.

O boletse fa motse wa gagwe o na le dikgwetlho tse dintsi, nngwe ya tsone e le thuto e e wetseng kwa tlase.

A re se ke sesupo sa gore ba ba tsileng pele ga bone ba ne ba na le motheo o o tsepameng, mme mo tsamaong ya nako wa reketla.

Kgosi o tlhalositse fa seemo sa thuto se supa gore fa batsadi le bogogi go na le sengwe se ba sa se tsamaiseng sentle, a re go botlhokwa go itshekatsheka gore ba baakanye.

Kgosi a re go lebega banni bangwe ba Mahalapye ba ikgatlholosa temo-thuo e e leng yone seikokotelo sa go tsisa dijo mo lefatsheng leno.

O rotloeditse banni gore e re ka paka ya temo ba eme ka dinao ba leme gore ba tle ba kgone go roba dijo tse di ka thusang motse otlhe.

O gakolotse banni gore borukutlhi jo ba lelang ka jone ga se boikarabelo jwa mapodisi, ke maikarabelo a bone e le morafe go bona gore bo fele.

A re banana ba ikgatholositse motse wa bone, ba inaakantse le menate le maitiso, mme a gakolola gore ba dire dilo tseo ka maikarabelo a gore ke bone baeteledipele ba kamoso.

A re ba dirisa maranyane thata mme ba sa a dirise sentle ka fa go ka ba sologelang molemo.

Kgosi o ne a ama kgang ya gore tirisano mmogo ya dikereke ga e a tlhapa sentle mme a re o batla seo se baakanngwa.

Kgosi Tshipe o rotloeditse gore go nne le tirisano mmogo mo morafeng le bodirelapuso gore dithuso di kgone go tswa sentle.

A re fa setshaba se ka seke se eme ka dinao sa emisa kgokgontsho, malwapa a tshwaragana a lwantshana le yone, ga ba na go tswelela jaaka ba eletsa.

O ne a kopa morafe gore o phepafatse tikologo ya motse e a boletseng fa e le leswe, a re go phepafatsa motse ga se tiro ya khansele, ke tiro ya monni mongwe le mongwe. BOKHUTLO