26 Sep 2023

Mothusa Tona wa Lephata la Thuto le Tlhabololo Dikitso Rre Aubrey Lesaso o akgotse sekole se sebotlana sa Gootau kwa Gootau go bo se ne sa tswa mo tlwaelesegong ya go kopa dithuso mme ba itirela madi ka mogwanto.

A re mogwanto oo, o tlaa ba thusa go dira madi le go nna le botsalano le ba-na-le seabe ka go farologana ba ba neng ba o tsene.

Rre Lesaso o ne a bua jalo kwa motseng oo morago ga mogwanto wa sekgala sa dikhilomithara tse tlhano, tse some le tse di masome mabedi o o neng o tshwerwe ke sekole se sebotlana sa Gootau.

A re botsalano jo bontsi bo diragala ka ditiro tse di tshwanang le tsa mogwanto, a tlatsa ka go re ba sekole sa Gootau ga ba a ka ba itshopara ba emela diphetogo mme ba dirile se Tautona Dr Mokgweetsi Masisi a se rotloetsang sa go fetola dikakanyo le maikutlo a bone.

Rre Lesaso a re setshaba ka kakaretso se tlhoka tirisanyo mmogo le popagano e e tshwanang le e ba sekole sa Gootau ba e dirileng ya go kopanya ba-na-le seabe go tswa kwa maphateng a a farologanyeng. 

A re seo se tlaa thusa lephata la gagwe go tshela tsetlana ya tebelopele ya tshaba e e rutegileng.

A re Motswana mongwe le mongwe o na le bokgoni jwa go isa lefatshe leno kwa pele. 

Ka moo o ne a supa fa puso e tlhoka thuso ya mongwe le mongwe go tlhabolola matshelo a ba ba tlhokang.

Rre Lesaso a re gore lefatshe leno le fitlhelele ditlhabololo le tlhoka gore mongwe le mongwe a tsee karolo.

A re ke ka moo go leng botlhokwa gore go dirwe moalo gore tshaba e e tlang e ithute mo go one.

O ne a supa fa se se ntshitsweng mo mogwantong oo se tlaa dira pharologanyo e tona mo go tlhabololeng thuto.

Mothusa tona o ne a supa fa barutabana ba ka seka ba kgona ba le nosi, ka jalo a rotloetsa botlhe ba ba neng ba tseneletse mogwanto oo go rotloetsa maikaelelo a sekole a go atswa baithuti ba ba dirileng sentle.

Mogokgo Gothatamang Gadifele a re mogwanto o ne o itebagantse le go kgobokanya madi a a tlaa thusang sekole mo latsatsing la kabo dimpho. 

A re maikaelelo a mangwe gape e ne e le go rotloetsa tsa botsogo. BOKHUTLO