03 Sep 2023

Banni ba Old Naledi ba tlaa agelwa letangwana la go thuma  mo lefelong le le siketsweng go nna la itloso bodutu.

Kago eo, e e tlaa dirwang pele ga ngwaga ono o wela e e beetsweng P1.4m e diilwe ke tsamaiso ya go ikopela ditiro e e neng ya seka ya tsamaa sentle.

Banni ba amogetse tlhabololo e ee tlaa dirwang mo kgaolong ya bone mo phuthegong ya kgotla e e neng e buisiwa ke Mopalamente Rre Dumezweni Mthimkhulu mo Gaborone bosheng.

O ne a re morago ga go aba tiro eo, go ne ga lemosega fa e abetswe rakonteraka yo e seng moagi wa Naledi, mme tshwetso e o ya boelwa morago.

Rre Mthimkhulu o ne a re botsamaisi jwa khansele ya Gaborone, ke jone bo nang le boikarabelo jwa go tsamaisa ditiro tse di ntseng jalo.

O tlhomamiseditse baagi gore tiro eo e tlaa simololwa ka jaana madi a yone a tswa mo letloleng la ditlhabololo tsa kgaolo.

Mopalamente Mthimkhulu o ne a re, lefelo leo le tlaa tlhamela baagi ditiro, go ntsha bana mo mekgwatheng le go ba faposa tiriso ya ditagi.

Rre Mthimkhulu o tlhalositse fa go tlaa nna le malatsi a bana ba tlaa thumang ba sa duele, le a ba tlaa duelang mme bagolo bone ba tlaa duela.

O ne a re letangwana leo le tlaa bo le tsamaisiwa ke komiti ya ditlhabololo tsa motse.

Mopalamente o ne a bega ha leobo la kgotla le lone le tlaa baakanngwa ka le setse le onetse.

Mokhanselara Rre Gopolang Montsho o ne a re kago ya ntlo ya modisa dikago kwa sekoleng sa Tshwaragano le yone e a simologa.

Rre Montsho ne a re kago e e neng e dirisiwa e le motlobo wa dibuka kwa sekoleng seo, e tlaa fetolwa go nna ya borutelo jwa bana ba ba tlaa simololang lekwalo lwa ntlha.

Mokhanselara Montsho o ne a re ba santse ba tlaa baakanya matlwana a boitiketso kwa lefelong la mmaraka.

Baagi ba ne ba lebogela ditlhabololo mme ba tlhalosa fa tiego ya tsone e ba beilwe ka ha mosing. ENDs