29 Aug 2023

Go ne go osha legong go sala molora kwa Cresta Bosele Hotel kwa Selebi Phikwe jaaka ba ne ba ipelela ngwao ya Setswana.

Moletlo o, o o neng o tshwerwe ka Matlhatso, o mo ngwageng wa bolesome le bongwe o ntse o tshwarwa ka maiteko a go tsosolosa le go ipelela ngwao, e akaretsa kapari ya setso, dijo tsa setswana, mmino le metshameko ya Setswana.

Mookamedi wa Cresta Bosele Hotel Rre Ferdinand Sebinyane a re maikaelelo a moletlo o ke go tsosolosa le go ruta bana ba ba tswang kwa tlase ka ngwao le dijo tsa Setswana.

O ne a gatelela botlhokwa jwa go somarela ngwao, a tlhalosa fa gantsi bana ba ba nnang mo ditoropong ba sa itse sepe ka ngwao ya Setswana ka gantsi ba seke ba etela kwa magaeng kwa ngwao e santseng e tshegeditswe.

O ne a re go botlhokwa gore bana ba nne ba tsena meletlo ya go nna jaana ka ba ka ithuta go le go ntsi mo go yone, a tlhalosa fa go dira jaana e se go tsosolosa ngwao fela mme go neela le bone badiragatsi sebaka sa go ipapatsa mo setshabeng.

Rre Sebinyane a re tiro e, e thusa thata ka go kopanya merafe go ithuta ka dingwao tsa e mengwe.

A re se gape se thusa mo dikgwebong tsa banni ba tikologo ya Selebi Phikwe ka ba reka dijo tsa Setswana mo go bone.

Mo godimo ga se Rre Sebinyane o tlhalosa fa Cresta Bosele e sa itebaganya fela le go dira dipoelo mme ba na le maitlamo a ba a ipeileng pele a go thusa batho ba tikologo e ba leng mo go yone, a tlhalosa fa mono-ngwaga ba abela sekole sa Rekakgona se se se rutang ba-na-le bogole tiro ya diatla mo Selebi Phikwe.

E rile a tswa la gagwe, mongwe wa badiragatsi yo o tswang kgakala le mmino wa Setswana Rre Ditiro Leero o tlhalositse fa go le botlhokwa gore batho ba nne ba kopana bogolo jang mo nakong ya gompieno e batho ba gateletsweng ke maikutlo ka go ka ba thusa go nna ba arogana maele a botshelo.

Rre Leero o ne gape a tlhalosa fa go le botlhokwa gore batho ba inaakanye le meletlo ya Setswana ka go a bo go jewa dijo tsa Setswana tse ba bongaka ba rotloetsang gore di jewe ka di a bo di sa tsenngwa metswako epe e e ka ba bakelang makoa.

Rre Leero a galaletsa Batswana go bo ba rata ngwao ya bone ba e supa ka kapari e o fitlhelang e segilwe ka botswerere jo bo kwa godimo.

Moletlo o o ne o tsenwe ke bagolo le bana go tswa mo mafelong a a farologaneng mme o ne o natefisiwa ke badiragatsi ba tshwana le Rre Bataadira Radipitse yo e leng moletsi wa katara le setlhopha sa mmino wa Setswana mo toropong e sa Kala tsa Kgale ga mmogo le baopedi ba bangwe ba mmino wa setso. BOKHUTLO