28 Aug 2023

Banni ba Ramonaka kwa kgaolong ya Kgatleng Botlhaba ba re ga ba itumedisiwe ke tiego ya ditlhabololo mo kgaolwaneng ya bone.

Ba buile jaana mo phuthegong ya kgotla e e neng e buisiwa ke Mopalamente Mabuse Pule bosheng.

Banni ba re Ramonaka ke mongwe wa metse e e saletseng morago ka ditlhabololo, ba tlatsa ka go re seemo se bifisiwa ke go kgaoga ga motlakase kgapetsakgapetsa, ditsela tse di sa tsamaegeng le letlhoko la ditiro.

E rile a ntsha pego, modulasetilo wa komiti ya ditlhabololo tsa motse, Mme Kgomotso Phiri, a bolela fa go tlhoka koloi kwa kokelwaneng go baya balwetse mo diphatseng.

A re ba turelwa kego hira dikoloi go isa balwetse kwa dikokelong.

Mme Phiri o boletse fa Ramonaka a amilwe ke tshwetso ya baoki ya go emisa go aba melemo, mme a bolela fa banni ba patelesega go senka melemo kwa dikokelwaneng tsa metse e e gaufi.

Fa a ntsha la gagwe, Mopalamente Pule o boletse fa palamente  e tsere tshwetso ya gore go okediwe mapalamente go tswa mo go masome a matlhano le bosupa go ya kwa go masome a marataro le bongwe.

O boletse fa komiti e e neng e kgaoganya melelwane ya dikgaolo tsa botlhophi tsa bokhanserala e ntshitse pego e e supang fa Ramonaka, Mmathubudukwane le Sikwane e tlaa nna kgaolwana e nngwefela ya khansele.

Le fa go ntse jalo, o boletse fa se se ka se ke se kgoreletse ditlhabololo kwa Ramonaka.

Rre Pule o tlhalositse gape fa palamente e dumalane ka melao e le lesome le borataro e e akaretsang o o sireletsang balwetse ba tlhaloganyo le tshomarelo tlholego le matlotlo.

O boletse fa  melao e, e tlaa tsena mo tirisong mo nakong e e gaufi ka Botswana a bereka ka morero.

O ne a supa fa monongwaqa madi a a fiwang ditiro tsa ditlhabololo tsa dikgaolo tsa bopalamente a tlaa dirisediwa go tlhabolola ditsela.

Rre Pule o rotloeditse banni go tsaya ka tlhoafalo mananeo a puso,  a re ka one ba ka inamola mo letlhokong la ditiro.

E rile a araba kgang ya motlakase, Rre Pule a bolela fa go solofetswe kgokelo ya mafaratlhatlha a sennelaruri a mono go tswa mo go a Afrika Borwa. BOKHUTLO