27 Aug 2023

Maloko a twantsho borukutlhi a kgaolo ya Mahalapye a abetswe dietsele go ba lebogela maiteko a bone a go dira tiro ka botswapelo le bonatla.

Ba neetswe dietsele tse kwa moletlong wa go ipelela go diragatsa maitlamo a bone a go sireletsa setshaba le ba sepodisi kwa  Mahalapye bosheng..

Fa a bua kwa moletlong wa kabo dietsele, Kgosi Tshipe Tshipe wa Mahalapye a re ntle le maiteko a ba twantsho borukutlhi, dikgang tsa borukutlhi di santse di tshwenya mo motseng wa bone. 

A re borukuthi bo ka fenngwa fela fa go ka simololwa kwa lwapeng, kwa eleng gone modi wa kgodiso ya ngwana.

Kgosi Tshipe a re batsadi ba tshwanetse go tsaa boikarabelo ka boitshwaro le mekgwa ya bana ba bone.

O boletse fa dilo tsotlhe tse di diragalang mo motseng di simolola kwa lwapeng, a supa fa thekiso ya diritibatsi ka mefuta ya tsone le nnotagi di rekisiwa mo malwapeng.

A re batsadi bangwe ba roma bana go rekisa dilo tseo mme e re ba tshwarwa batsadi ba bone ba bo ba ba sireletsa.

O tlhalositse fa go dira jalo e le go senya bokamoso jwa bana e bile go paledisa mapodisi go dira tiro ya bone ya go lwantsha borukutlhi.

Kgosi Tshipe o ne a supa gape fa a tshwenngwa ke bogodu jwa megala ya metlakase, a re le yone e fitlhiwa mo malwapeng. 

A re dikgang tse ga di fokotsege ka batho ba di rotloetsa ka go bapatsa megala fa bangwe ba e reka mme go sa tsewe dikgato dipe. 

Kgosi Tshipe o rotloeditse botlhe go fetola ka fa ba akanyang ka teng le ka fa ba dirang dilo ka teng kwa malwapeng gore ba kgone go lwantsha borukutlhi.

O boletse fa dikgang tsa kgokgontsho le tsone e le kgwetlho mo malwapeng mme a kopa gore di emelwe ka dinao gore di fele.

O akgoletse maloko a twantsho borukutlhi go dira ka natla mo tirong ya bone le ntswa ba ithaopile.

A re go tsaya dietsele ke go rotloetsa ba ba dirileng sentle le go gwetlha ba ba saletseng kwa morago go dira bontle.

Fa a tswa la gagwe Mookamela mapodisi a Mahalapye le metse e e mabapi Senior Superintendent Reuben Mphoeng a re ba ipelela maiteko a bone a go lwantsha borukutlhi.

Snr Supt Mphoeng a re borukutlhi bo tla ka ditsela tse di farologaneng mme a kopa setshaba go tsibosa ba sepodisi ka nako a re go dira jalo go ka thusa gore ba kgone go fitlhelela maikaelelo a bone a go sireletsa setshaba go ya pele. BOKHUTLO