26 Jun 2023

Mapodisi a Shakawe a tlhotlhomisa tiragalo e mo go yone bomme ba le babedi ba kgotla ya Mabudutsa kwa Gani mo kgaolong ya Okavango ba tlhokafatseng ba sena go nwa melemo ya setso.

Fa a bua mo potsolosong ka Labotlhano, mogolwane wa mapodisi a Shakawe, Superintendent Ogolotse Tampa a re mapodisi a amogetse tekodiso ka dintsho tsa bomme bao ka Labobedi wa beke e e fetileng, go tswa kwa kokelong ya Letsholathebe kwa Maun. Bomme bao ba ne ba fetisediwa kwa Maun go tswa kwa kokelong ya J.P Kavindama.

Supt Tampa a re ditlhotlhomiso tsa bone di supile fa bobedi joo, bo le dingwaga tse di masome mabedi le bosupa le masome mabedi le boferabobedi. Go tlhalosega fa bobedi joo e ne e le bangwe ba bomme ba ba neng ba ile go rwalela Seetebosigo a tlhola lesome le bongwe, mme ba epa melemo e ba fetileng ba e bedisa ba bo ba anwa, mme go tswa foo ba seka ba tseega sentle mo ba feletseng ba isiwa kwa kokelwaneng ya Gani fa ba bangwe bone ba ne ba siame.

E ne ya re morago seemo sa bomme ba babedi bao sa bifa, mme ba isiwa kwa kokelong ya Letsholathebe kwa Maun fa yo mongwe a ne a fetisediwa kwa kokelong ya Nyangabgwe kwa Francistown kwa a tlhokafaletseng teng.

Supt Tampa a re maduo a ntlha a diipone tsa bookelo a supa fa baswi ba amegile diphilo, dibete le makgwafo, ka jalo ba ne ba sa tlhapologe sentle e bile ba akgwa.

Kgosi Gaolathwe Botolamango wa Gani o ne a gakolola banni ba motse oo gore ba ele tlhoko tiriso ya melemo ya sets. A re tiragalo eo ga se ya ntlha. Ends