19 Jun 2023

Bodiredi jwa kokelwana ya Letsholathebe bo akgoletswe   go dira ka natla mo go iseng ditirelo tsa botsogo ka manontlhotlho.

Mo tekodisong mo phuthegong ya kgotla e e neng e buisiwa ke mopalamente wa bone Rre Simon Moabi,  modulasetilo wa komiti ya ditlhabololo tsa motse, Rre Jiniva Pelaelo o kaile fa tirisanyo mmogo magareng ga bone le bodiredi joo, e le e e netameng.

A re bodiredi jwa kokelo eo bo thusa ka fa tshwanelong mme e bile ba nna ba ipha matsapa go ba tlhatlhelela le go ba tlhagisa ka sepe fela se se amanang le botsogo jwa bone, a re bosheng ba ne ba ba tlhaba podi matseba go ikelatlhoko mo bolwetseng jwa letlhatso le letshololo.  Rre Pelaelo a re kokelwana ya bone e na le bodiredi jo bo lekaneng, mme a kopa gore e atolosiwe go kgona go itepatepanya le dipalo tsa batho mo motseng.

Modulasetilo o supa boitumelo ka maduo a a nametsang a lokwalo la bosupa a sekole se sebotlana se dikileng se a ntshitse.

Rre Pelaelo o ne a kopa mophepafatsi mo diofising tsa kgotla ya bone. O ne a kopa gore tsela ya Letsholathebe/Sechele e nne e gopiwa gangwe le gape, a kopa gore go agiwe borogo mo tseleng eo, fa nokeng ya Vukwi.

Modulasetilo a re tsela ya Letsholathebe-        Francistown e tlhoka go tsibogelwa, ka go na le fa e senyegileng thata teng, a re tsela eo, e khutswafatsa mosepele wa banni go ya kwa Francistown.

Mo go tse dingwe, Rre Pelaelo o kopile gore ba sekasekelwe go okelediwa palo ya bodiredi jwa Ipelegeng go tswa kwa go masome a mane le motso go ya kwa go masome a matlhano.

O tsweletse gape a kopa gore dikatso tsa Ipelegeng, madi a bagodi le a maloko a VDC di  okediwe, a supa fa botshelo jwa segompieno bo le turu.  Rre Pelaelo a re le fa gotwe VDC ke boitlhaopo, seo ga se a tshwanela go ba gatelela ka lemmenyana le eseng la sepe ntswa ba dira namane e tona ya tiro. O ne a supa botlhokwa jwa gore maloko a VDC, fela jaaka makhanselara le mapalamente, le bone ba fiwe sebaka sa dingwaga tse tlhano ba le mo ofising go na le tse tharo, a re seo se ka thusa gore ba kgarametse ditlhabobolo tsa metse ya bone botokanyana pele ba rolela ba bangwe.

Monni mongwe wa Letsholathebe, yo o dirang e le moithaopi wa tsa sepodisi (Police Volunteer) o kopile gore ba neelwe kapari tsa itshireletso, tse di tsamaelanang le tiro ya go paterola.

Mokhanselara wa kgaolwana ya Masunga, e e akaretsang metse ya Letsholathebe le Vukwi, Rre Edward Gazageni o gwetlhile banni go nna ba etela diofisi tsa maphata, go kopa thuso mme ere go retetse e bo e le gone ba ka lebisang mokhanselara kgotsa mopalamente. O ne a itsese banni ba Letsholathebe le Vukwi fa phatlalatso ya mafaratlhatlha a motlakase le metsi mo dintlheng dingwe tsa metse ya bone di tlaa dirwa mo tsamaong ya nako.  BOKHUTLO