30 May 2023

Ba mokgatlho wa Phikwe Bikers Charity Run ba abetse Rre Antony Gulubane ntlo kwa kgotleng ya Botshabelo mo Selebi Phikwe ka Matlhatso.

Fa a bua kwa moletlong wa go aba ntlo eo, mothusa ratoropo wa Selebi Phikwe, Rre Molefhe Molatlhegi o ne a leboga ba Phikwe bikers go bo ba dule Rre Gulubane matshidiso , a tlhalosa fa ntlo eo e tlaa mo fa seriti.

Rre Molatlhegi o tlhalositse fa bonno bo le botlhokwa thata ka jaana bo sa fe  motho seriti fela mme bo mo fa kwa a tshabelang dibetso tsa tlholego teng jaaka dipula le serame.

Ntlo eo e akaretsa kamore ya borobalo, ya boapelo le ee tlhapelang. Rre Molatlhegi a re se se dirilweng ke ba Phikwe bikers ke go supa lorato le tirisano mmogo le setshaba se ba tshelang naso.

A re se ke se se rotloediwang ke puso gore setshaba le dikhamphani di tsenye letsogo go thusa ba ba dikobo dikhutshwane ka puso le sa tlhole ena le madi a go thusa mongwe le mongwe.

E rile a tswa la gagwe mothusa kgosi wa Ikageleng, Kgosi Molefhi Pilane o tlhalositse fa go aba go sa ree gore motho o a bo a na le go le gontsi mme go supa tirisano mmogo e Batswana ba itsegang ka yone.

Kgosi Pilane o supile fa mo dingwageng tsa gompieno kago e le turu mme a leboga ba Phikwe Bikers go bo ba ne ba itima monate go tlhomamisa gore Rre Gulubane o nna le bonno jo bo botoka.

O ne a re go tlhokomela mo-na le- bogole ke tiro e tona e bile e le dingalo mme a kgothatsa setshaba go nna ba thusa Rre Gulubane ka se ba ka se kgonang gore le ene a nne le botshelo jo bo botoka.

Rre Laurence Puso, yo e leng leloko la mokgatlho, o tlhalositse fa mokgatlho wa bone o sa itebaganya le go ijesa monate fela ka dikuta mme ba na le maitlamo a ba a ipeileng pele a go thusa ba ba tlhokileng lesego.

A re ba dira se ba setse morago letshego la tebelo pele ya setshaba, a re ke maitlamo a bone ke gore ngwaga le ngwaga ba bo ba abela mongwe yoo tlhokileng lesego ntlo.

Rre Pule a re ba thusitswe ke ba dikgwebo tsa Selebi Phikwe mme a tlhalosa fa ba tlaa tswelela ka go dira pharologanyo mo matshelong a batho.

Fa  a amogela mpho mo  boemong jwa ga Rre  Gulubane yoo dingwaga tse di masome mabedi le bobedi, Mme Magret Gulubane o ne a leboga ba Phikwe Bikers go bo ba agetse ngwana wa gagwe ntlo, a tlhalosa fa go ne go le bokete go mo tlhokomela ya kamore ele nngwefela. Ends