29 May 2023

Banni ba Gojwane le Serule ba lela ka letlhoko la metsi.

 Ba buile se fa ba lekodisa Mopalamente wa bone wa Serowe Bokone ka labobedi.

E rile a ntsha pego ya gagwe, modula setilo wa komiti ya ditlhabololo tsa motse wa Gojwane, Mme Mogogi Khumo a re ba na le tlhaelo ya boroko jwa badirela puso, e bile badirela puso ba theogela ba tswa kwa Serule le Sese.

Mme Khumo a re ba kopa gore kokelwana ya bone e atolosiwe go dira lobaka lwa dioura di le masome mabedi le bone, ka gore mo nakong ya gompieno go theogelwa oura di fera bobedi fela.

A re ba kopa thuso kwa kokelong ya Serule mme go a ba turela ka ba hira dikoloi go isa molwetsi koo.

Mme Khumo a re ba na le letlhoko la matlo a borutelo, mo komiti e feletseng e ntsha matlo a le mabedi go a neela sekolo go a dirisa gore bana ba seka ba felela ba rutelwa ka fa tlase ga ditlhare.

E rile a tswa la gagwe, Mopalamente Rre Baratiwa Mathoothe a ba lekodisa gore palamente e tsere tshwetso ya gore go okediwe dipalo tsa mapalamente go tswa mo go masome a matlhano le bosupa (57) go nna masome a marataro le bongwe (61).

Rre Mathoothe o tlhalositse fa komiti e e neng e kgaoganya melelwane ya botlhopi, e isitse metse ya bone kwa Tonota. A re seo se seka sa ba tshwenya ka gore o ya go nna mopalamente wa bone go fitlhelela kgwedi ya ditlhopo ngwaga o o tlang.

Mopalamente Mathoothe a re monongwaga madi a Constituency Community Projects a ya go dira ditsela tse di mo metseng fela jaaka taolo e laotse.

A re taelo e ba bolaile ka gore madi a, a ne a ba thusa mo go ageng matlo a maroko ba hirisetsa badirela puso ba ba direlang mo metseng ya Gojwane le Serule.

Rre Mathoothe o ba lekodisitse ka madirelo a mashi kwa Serowe a a senyegileng, a supa fa puso e tsere tshwetso ya go a tsosolosa.

O ne a kopa banni go tsaya madirelo ao ka tlhwaafalo ka go ka ba thusa go oba letsogo.

E rile a araba kgang ya letlhoko la metsi, Rre Gaongalwe Dengu go tswa kwa koporasing  ya metsi kwa Selibe Phikwe, a solofetsa banni gore metsi a gorogile mo metseng ya bone, a supa fa e tlaa re kgwedi eno e fela, ba tla a bo ba nwa metsi go tswa kwa Letsibogo. Bokhutlo