11 May 2023

Tautona Dr Mokgweetsi Masisi o gomoditse ba lelwapa loora Moilwa, morago ga go tlhokafala ga ga Mme Tsholofelo Moilwa.

Mme Moilwa e ne ele motsadi wa ga Mme Goitsemang Morekisi yo eleng mokwaledi mogolo mo lephateng la Merero ya Ofisi ya ga Tautona.

E rile a ntsha lefoko la kgomotso, Tautona Dr Masisi a ba rotloetsa gore ba tshwaragane ka kagiso le molemo. 

O ne a tlhalosa fa Mme Moilwa e ne ele leloko la popota la phathi ya Botswana Democratic Party (BDP).

Dr Masisi o ne a gomotsa mo boemong jwa puso le jwa BDP. 

Tautona Masisi o boletse gore Mme Moilwa o nnile le seabe mo tlhabololong ya lefatshe leno.

Fa a amogela kgomotso, moemedi wa lelwapa Rre Boikanyo Moilwa o ne a lebogela Tautona le lekoko la gagwe go bo ba lekotse ba lelwapa la moswi.

Rre Moilwa o ne a re melaetsa ya puso le kgomotso di ne tsa ba fodisa, mme ba nna le tsholofelo le boitumelo.

Mme Moilwa o tlhokafetse kgwedi eno e tlhola gangwe, a le dingwaga di le masome a ferabobedi le boferabobedi. Mme Moilwa o boloketswe kwa Otse kgwedi eno e tlhola garataro. BOKHUTLO