03 May 2023

Babereki ba maphata a puso ba rotloeditswe go dira ka natla go thusa go gorosa ditlamelo kwa setshabeng ka nako.

Kgakololo eo e ntshitswe ke modulasetilo wa khansele ya Tsabong, Rre Hendricks Jacobs ka letsatsi la babereki mo Tsabong. 

A re seabe sa babareki se botlhokwa mo go godiseng itsholelo ya lefatshe.

Ka jalo, a re ntleng le seabe sa bone go ka seke go nne le tswelelopele le ditlhabololo mo lefatsheng.

Rre Jacobs a re puso e tseela kwa godimo ditshwanelo tsa babereki le seabe sa makgotla a babereki, ka jalo a re ba tshwanentse go tshwaragana go lwela ditshwanelo tsa bone.

A re puso e tla tswelela e dira maiteko a go araba dilelo tsa bone.

O kgothaditse makgotla a babereki le babereki go sala morago le go diragatsa melao ya pereko ka nako tsotlhe, a re go dira jalo go ka tiisa tomagano gareng ga mohiri le mmereki le go sireletsa ditswanelo tsa boo-babedi. 

A re fa mmereki a itumetse o tia moko mo tirong, ka jalo a ntshe maduo a bonalang. Ka jalo a re puso e ikaegile thata ka dikitso le boineelo jwa babereki ka jalo go botlhokwa go sala tsamaiso morago.

O tsweletse are go botlhokwa gore badireddi ba direle mo lefelong le le sireletsegile ebile le itumedisa gore ba kgone go iperekisa ba sa salwa morago.

O supile gore melao ya khiro e rotloetsa mohiri le mohiriwa go itse ditshwanelo tsa bone gore ba kgone go dira botsalano jo bo amolesegang mo ditirong le gone go ntsha maduo aa nametsang.

Rre Jacobs o tlhalositse gape gore melao ya khiro e tsentse leitlho thata go bona gore mafelo a pereko le sireletsegile go amogela mmereki le bao ba ba kopang thuso.

Ka jalo o gakolotse babereki go ela thoko boitshwaro jwa bone ka jaana lefelo la pereko e le la setshaba sotlhe.

A re ba tshwanentse go dira ka natla go direla setsaba  sotlhe ka kakaretso le go fitlhelela maitlamo a puso.

Moemedi wa lekgotla la babereki la Botswana Land Board Local Authorities and Health Workers Union  (BLLAHWA), Rre Thato Tumaeletse o supile gore letsatsi la babereki le botlhokwa ka le dirisiwa go itshekatsheka.

Rre Tumaeletse a re mabaka a pereko a tlhokwa go seka-sekwa, le go tswelela ka go lwela kgololesego le  ditshwanelo tsa maloko a bone ka go farologana. Bokhutlo