26 Apr 2023

Komiti e e filweng boikarabelo jwa go sega sesha melelwane ya dikgaolo tsa botlhophi tsa bopalamente le bokhanselara mo kgaolong ya Letlhakeng e simololola tiro Motsheganong a roba bongwe.

Modulasetilo wa komiti, yo e leng molaodi wa kgaolo ya Letlhakeng, Rre Ronald Masole a re go sega melelwane ya dikgaolo tsa botlhophi ke tiro e e masisi, ka jalo e tlhoka go dirwa ka kelelelo. 

O buile jalo mo phuthegong ya komiti ka Labobedi. Rre Masole a re tsamaiso ya ditlhopho e tlhoka go dibelwa le go tshwarwa ka matsetseleko go itsa dikgotlhang. 

Ka jalo o kopile maloko a komiti eo go dira tiro ka botswerere, ba itse fa ba ba sa emela dikeletso tsa bone, mme romilwe ke setshaba.

O tlhalositse gore morago ga go kgaoganya melelwane ya bopalamente go tsena kgaoganyo ya melelwane ya dikgaolwana tsa bokhanselara. 

Rre Masole a re komiti e tlaa tsamaya le metse yotlhe go akarediwa le mafelo otlhe a a mo kgaolong e go fitlhelela tiro e wela.

Mogolwane go tswa kwa ofising ya khansele e e dirang moalo wa lefatshe, Rre Tefo Matong o tlhalositse gore kgaolwana ya bokhanselara e tshwanetse go nna le batlhophi ba le 4 015.

Rre Matong o tlhaloseditse maloko a komiti gore ba tshwanetse go lebelela dikeletso tsa batho le dikakanyo tsa bone le go lebelela melelwane e mengwe e e leng teng.

O tlhalositse botlhokwa jwa go sekaseka mo go tseneletseng mafelo a a ka tlhongwang matlhophelo gore setshaba se seka sa tsaya mosepele o moleele go latela matlhophelo.

Rre Matong a re kgaolo ya botlhophi ya Takatokwane e na le makhanselara a le lesome le bobedi, a tlatsa ka go re morago ga tshekatsheko e e dirilweng kgaolo e okeleditswe ka kgaolwana ya mokhanselara e le nngwe, ka jalo e na le dikgaolwana tsa bokhanselara di le lesome le boraro.

Mothusa kgosi ya Letlhakeng, RreTumelo Puleng a re morero o botlhokwa mo pusong ya batho ka batho.

Kgosi Puleng o kopile komiti go tshwara tiro eo ka manontlhotlho le go baakanya diphoso tsa nako e e fetileng. BOKHUTLO