26 Apr 2023

Mookamela mapodisi a Maun, Superintendent Dennis Zilawe o ikuetse mo setshabeng go ba thusa go tshwara selalome se se tlhorontshang bomme ka go ba thubetsa.

O ikuetse jalo mo potsolotsong le BOPA, a supa fa selalome seo se thubeditse bomme ba le babedi ka mafelo a beke gaufi le noka ya Thamalakane.

O tlhalositse fa mo ditlhotlhomisong, go bometse fa batswa setlhabelo ba kaya mmelaelwa yo o tshwanang mo ditiragalong tsa bone.

Mo tiragalong ya ntlha, moithuti wa dingwaga tse di lesome le boferabobedi wa sekole se segolwane sa Maun o ne a thubediwa maphakela a Matlhatso ka nako ya borobabongwe.

Supt Zilawe a re moithuti yoo o ne a ya sekoleng mme a dirisa tsela e e sekgwa e e tlolang noka ya Thamalakane gaufi le kgotla ya Borolong mme selalome seo sa mo tswa ka fa morago se ipipile sefatlhego. A re selalome seo se ne sa tshosetsa mosetsana yoo ka thipa sa bo sa mo gogela fa ditlhareng tse di kitlaneng sa itseela dikobo ka dikgoka morago sa inaya naga.

A re mme mongwe wa dingwaga tse di masome mabedi le boferabongwe le ene o ne a thubediwa ka lone letsatsi leo a leka go kgabaganya noka ya Thamalakane go lebagana le sekole sa ithutelo ditiro sa Maun Technical College.

A re mme yoo le ene o ne a kopana le monna mongwe yo o neng a kaya fa a mo itse mme ene a latola seo. Supt Zilawe a re e ne ya re mme yoo a hulara go tswelela le mosepele, selalome seo sa mo phamola sa mo gogela mo sekgweng se se gaufi le noka sa itseela dikobo ka dikgoka mme ya re se fetsa sa tsena ka lenga la seloko.

Supt Zilawe o ikuetse mo setshabeng go emisa go dirisa ditsela tse di ralalang sekgwa ka jaana di baya matshelo a bone mo diphatseng tsa go tlhaseselwa ke dirukutlhi. Ends