23 Apr 2023

Setshaba se kgothaditswe go neela lenyalo tlotla e e le tshwanetseng.

Mosimolodi wa mokgatlho wa Dingwetsi mo Botswana, Mme Grace Silver, yo o neng a bua le dikgosi le merafe ya kgaolo ya Letlhakeng bosheng, a re lenyalo le tlhodilwe ke Modimo, mme bobedi bo jo bo nyalanang, bo tshwanetse go le fa tlotla e Modimo ka sebele a e le nayang.

A re ledula mo lwapeng le dirwa ke batho ba ratana, e bile ba tlotlana, ka go ikgapha mo bosuleng.

Mme Silver a re mokgatho o tlhametswe go busetsa serodumo sa lenyalo ka go leka go baakanya tse di leswafatsang lenyalo.

A re mokgatlho wa bone o ila tlhalo, a tlatsa ka go re lenyalo ga se teko e motho a tsenang mo go yone a bo a tswa, mme ke selo sa sennela ruri, go fitlhelela bobedi joo bo kgaoganngwa ke Modimo yo o ba kopantseng.

A re bangwe ba kgona go dira dilo tse di duleng mo tseleng, jaaka bonyatsi, a re seo ke sone se rotloetsang tshotlako ya lenyalo.

Mme Silver O ne a kgalemelela borre bonyatsi, a re ba tsee boikarabelo jwa go nna ditlhogo tsa malwapa a bone.

Mme Silver a re banyalani ba tshwanetse go tshela ka kagiso le lorato go tila dikgang tsa kgokgontsho mo lenyalong.

E rile ba mo kgwa dikgaba, ba supa fa mokgatlho o tsile ka nako e e maleba, ka jaana lenyalo le sotlwa ke batho ba ba tsenetseng mo go lona go keta.

Mme Neo Marang-Supang o ne a gakolola morafe gore le fa gantsi go buiwa ka kgokgontsho ya bomme, borre le bone ba a kgokgontshiwa.

A re o sale a ratile lenyalo go tswa bonyaneng.

Mme Supang, yo o tsenyeng mmabontle wa Mrs Botswana, a re mokgatlho wa dingwetsi o ikaegile ka lefoko la Modimo, ke ka moo ba eletsang go bona lenyalo le nna le seriti.

Rre Mohibidu Nkwane ene o ne a re go eteletsa Modimo kwa pele mo lenyalong ke yone tsela ya go fenya mmaba wa lone.

O ne gape a re o tshwenngwa ke gore borre ga ba kgone go ipuelela, ntswa ba kgokgontshiwa ka go itewa le go tingwa dikobo.

Rre Dikakanyo Gaoswediwe ene o ne a re bonyatsi bo borai ka bo felela bo baka dipolaano, fa Rre Lebopelo Radimpa a kopile borre go simolola mokgatlho wa bone ka ba na le seabe mo dikgannyeng tse di digang seriti sa lenyalo.

Rre Radimpa a re borre bangwe ga ba tlotle malwapa a bone, mme seo se bake tlhakatlhakano le dikgoberego.

O kopile borre go emisa go nna le dinyatsi, a re seo se ba bakela go nyatsega mo setshabeng.

E ne e rile go le pele, Kgosi Tumelo Puleng a amogela morafe, a supa fa mokgatlho wa dingwetsi o dira tiro e ntle ka jaana lenyalo le lebaganywe ke dikgwetlho.

A re go tswa goo-Lowe, ngwetsi le matsale ga ba ke ba utlwana, mme ke Modimo fela a ka ba kgontshang go dira mmogo.

Mokgatlho wa dingwetsi o simolotswe ka 2010, wa kwadisiwa semmuso ka 2015.

O na le maloko a le dikete di le tlhano mo Botswana.

O setse o na le makala kwa Lesotho le Zambia, mme wa re o ikaelela go bula le lengwe kwa Afrika Borwa mo bogaufing.  BOKHUTLO