05 Apr 2023

Batawana ba amogetse Kgosi Tawana Moremi II mo setilong sa bogosi ka boitumelo le loshalaba, morago ga go tsaya dingwaga di le masome a mabedi a le kwa sepolotiking.

Mo moletlong wa go mo amogela kwa kgotleng kgolo ya Maun ka Mosupologo, morafe o ne wa fiwa sebaka go kgothatsa le go amogela kgosi mme ba supa fa ba itumetse.

Tona wa pele, Dr Pelonomi Venson- Moitoi o tlhalositse fa go boela mo setilong ga ga Kgosi Tawana e le ditso ka yaare bangwe ba fiwa tshono ya go tshwarelela setilo ba ganelele mo maemong.

A re bana ba ga Moremi ba dirile ditso ka go dirisana sentle, ka mowa o montle mme a kopa morafe go ema bogosi nokeng.

“Re bone tshwaragano le lorato magareng ga ga Kgosi Moremi II le mogolowe e leng Kealetile Moremi yo a ntseng a tshwareletse bogosi ebile ke a le kopa Batawana, le seka lwa senya botsalano jo,” Dr Venson-Moitoi a kgothatsa.

Kgosana ya kgotla ya Goo-Seetso, Kgosi Gakemoeng Molaletsi o eleleditse Kgosi Tawana botsogo abo a itlama gore e le dikgosana, ba tlaa mo tshegetsa.

O lebogile kgaitsadie kgosi yo a ntseng a tshwareletse bogosi, a supa fa ba ntse ba bereka sentle ebile ba dirile ditso ka go seka ba lwela setilo sa bogosi.

A re o kopile kgosi gore a eme kgatlhanong le ditagi, a re bana ba gompieno ba dule mo tseleng ka ba setse ba nwa bojalwa le go dirisa ditagi.

Moruti John Kamedi wa Sabata ene o tlhalositse fa dikgosi di le botlhokwa mo setshabeng ka e le batlodiwa ba Modimo.

O kgothaditse kgosi go rata morafe wa gagwe ka go lekalekana a re bangwe ba tsile go mo tsisetsa diemo le dikgwetlho mme a tsepame, a seka a etsaetsega.

A re go etelela batho pele ga se tiro e e motlhofo ka batho ba farologana ka maitshwaro le maikaelelo mme se se tlhoka botlhale.

Mogwebi wa Maun, Rre John Wellio o supile fa a itumetse go bo kgosi a boetse mo setilong mme a leboga le yo a ntseng a mo tshwareletse go bo a dirile tiro e ntle. A re Batawana ba na le merafe e mentsi e ba e eteletseng pele, go tswa Phuduhudu, Khwai, go ya kwa Gudigwa ka jalo, a kopa morafe gore ba eme nokeng kgosi ya bone ka dinako tsotlhe.

Moruti Galeganwe Mbulawa wa UCCSA o lebogile Kgosi Tawana go bo a diragaditse maitlamo a gagwe jaaka a ne a ba laetse gore o tlaa boela mo setilong sa gagwe.

O boleletse kgosi fa Batawana ba mo rata ebile ba sa bolo go emela letsatsi la Moranang a le malatsi a mararo

“Mogoloo ebong Kealetile, o go rata thata ka gore le motho a le mongwe fela ebile ke kopa gore go seka ga nna le ope yo o tlaa kgaoganyang bana ba,” Moruti Mbulawa a supa.

Fa a bua e le monana,  Rre Boago Morolong o boleletse kgosi fa nnotagi e golela pele mo dikoleng mme a mo kopa gore a gagamatse maiteko a go lwantsha boitshwaro jo. BOKHUTLO