02 Mar 2023

Tshwaragano ya batsadi le barutabana ke konokono mo go tsosoloseng serodumo sa thuto ya lefatshe leno.

Se se builwe ke Mopalamente wa Lentsweletau/Mmopane, yo gape e leng mothusa tona wa thuto le tlhabololo dikitso, Mme Nnaniki Makwinja fa a ne a etetse kwa sekolong se se botlana sa Gakuto ka Laboraro.

Maikaelelo a leeto leo, ene ele go abelana megopolo ya go tokafatsa seemo sa thuto mo sekoleng seo le ba-na-le seabe. 

Mme Makwinja o ne a akgolela  barutabana ba sekole seo tiro e ntle e ba e dirang ka maduo a sone a tokafala. 

Mothusa tona a re mo nakong eno, sekole se okeditse maduo a sone a lekwalo lwa bosupa ka 6 per cent, ka thotloetso e ba e neelang baithuti. 

A re seo ke sekao sa gore peo e barutabana ba e jwadileng ga e a wela mo mmung o o lekgarapa.

Mme Makwinja a re lentswa seru sa COVID-19 se ne sa ama maduo le maitsholo a bana mo dikolong, go a itumedisa gore sekolo sa Gakuto sone se ne sa gatela pele. 

O ne gape a akgolela barutabana ba sekole seo boineelo le bopelotelele jo ba bo supileng mo tirong, mme a ba kopa go tswelela ka go rotloetsa bana go tsaa thuto ya bone ka thwaafalo.

O tlhalositse fa thuto e lengwe ya matshego a a ka dirisiwang go itlhotlhora lehuma le go tlhabolola matshelo a batho

Mme Makwinja o ne gape a re mo maitekong a go tsosolosa seemo, puso e abela baithuti le barutabana didirisiwa tsa maranyane, seo ele nngwe tsela ya go isa thuto kwa pele ga dilo tsotlhe mo lefatsheng leno. 

O ne a tlhalosa fa maranyane a le botlhokwa ka mo malatsing ano, motho a kgona go dira dithuto dingwe le dingwe mo maranyaneng a le mo lwapeng, go na le go ya sekoleng.

Mogokgo wa sekole seo, Mme Elizabeth Letsholo a re le ntswa se dirile botoka, go na le dikgwetlho di akaretsa tlhaelo ya matlo a borutelo, matlo a borobalo a barutabana le lefifi le le apereng sekole mo go felelang go baa matshelo a bone mo diphatseng. 

Mme Letsholo o ne a kopa tona go ba kopela dipone tsa marang a letsatsi mo go ba ba maleba, go thusa go lwantsha seemo seo.

Fa a tswa la gagwe, Mothusa mokwaledi wa khansele ya Kweneng, Rre Douglas Sesimanyana o ne a bolela fa khansele e ntshitse madi go aga matlo a borutelo a le mane. 

O boletse fa tiro e sa le e simolotswe ka Ngwanatsele ngwaga o fetileng, mme e solofetswe go wela ka Phatwe monongwaga.

O tsweletse gape a re go  dumalanwe gore madi a ditlhabololo a ngwaga o o latelang a dirisiwe go shafatsa matlo a borutelo mo dikoleng. BOKHUTLO