02 Feb 2023

 Banni ba kgaolwana ya Taung kwa Gaborone ba gakolotswe go sa loba borukhutlhi jwa bana ba bone ka ba ka nna borai mo matshelong a setshaba le mo batsading ba bone.

Erile a buisa phuthego ya kgotla kwa Taung ka Mosupologo, Mopalamente wa kgaolo ya Gaborone Bokone, Rre Mpho Balopi a supa fa bana ba go nna jalo ba sa kgalemelesege mme a kopa botsadi go laola metsamao ya bana.A re batsadi ga re ba nne le boikarabelo mo matshelong a bana ba bone mme le bone bana, ba tseye boikarabelo jwa matshelo a bone gore ba nne le seabe mo go ageng ledula le Botswana a itseweng ka lone.

Mothusa mookamedi wa mapodise mo kgaolong, Assistant Superintendent Victor Leshiba a re ba sepodisi ba tshwenyegile ka go tlhoka tsebe mo go feteletseng ga banana ba kgaolo.A re bana ba inaakantse le borukhuthi, bosigo kana motshegare go tshwana fela. Fa a itebaganya le tiriso ya diritibatsi, Assistant Superintendent Leshiba o ne a tshwaya botsadi phoso a re ke bone ba itseng motswedi wa tsone.

A re diritibatsi di rekisiwa ke bananyana ba bannye thata, seo e le sesupo sa gore ba rumile ke bagolo. Assistant Superintendent a re e le ba sepodise, ba palelwa ke go emisa dikgang tse ka gangwe le gape, dikgang tsa teng di nna madiadia fa ba botsolotsa ngwana ka o a bo a le dingwaga tse di kwa tlase go seka.

“Le a ba bolaya ebile le ba bolaela ruri,” ga tlhalosa Ass Sup Leshiba, a re jaaka bana ba dirisa diritibatsi ga gona jaaka fa di ka tswa mo go bone. O ne a tlhalosa fa sepodisi se ka se kgone se le nosi, a re ‘dirukhutlhi di mo matlong a lona’ ka jalo a kopa gore go nne le kgalemo. e seng jalo dikokelo di tla tswalwa ka gore ba tlhorontsha baoki bosigo ka baoki ba ba theogelang bosigo ba sa babalesega bakeng la borukhuthi jwa bana ba kgaolo.

E rile a ntsha pego ya komoti ya Ditlhabololo, mothusa modulasetilo, Rre Ginger Ernest o ne a re banana ba dirisa   diritibatsi thata. Rre Ginger o tlhalositse gore diritibatsi di akaretsa motekwane le katse di tsere phekelo e sele mo kgaolong, a re ka jalo go nna le botlhoka tsebe. “Motekwane o a gogwa, ga re itse gore o tswa kae, mme o jewa, jewa fela, re ipotsa gore o tswa kae” ga tlhalosa Rre Ernest.

Mo dikganyeng tse dingwe, Rre Ernest o ne a supa matshwenyego a go tlhoka go tsewa ga matlakala.

O ne a re matlakala a tsa ya dibeke a sa olelwe , mme ka jalo a bake leswe le le tseneletseng mo kgaolong a re dintsha di a phunya, mo go sa siamelang botsogo jwa batho le tsone dintsha tota. BOKHUTLO