11 Jan 2023

Banni ba motse wa Bodibeng mo kgaolong ya Ngamiland ba tlhaloseditswe gore go lwantsha borukutlhi go simolola ka go ikaga ka bo bone jaaka morafe.

E rile a bua mo phuthegong ya kgotla ka Mosupologo Mopalamente wa Ngami, Rre Cater Hikuama o ne a bolelela morafe wa Bodibeng gore lentswa bontsi bo akanya gore borukutlhi bo fedisiwa ke mapodisi seo ga se nnete.

O supile matshwenyego ka borukutlhi mo metseng ya Bodibeng le Kareng jo bo ileng magoletsa, mme a re o dumela fa badira melato e le bana ba metse e.

A re go le gantsi batho ba akanya gore twantsho borukutlhi ke ya mapodise a le nosi ka jalo borukutlhi bo golele pele lentswa go nale mapodisi ka go bo setshaba se sa ikitee ka thupana go bo lwantsha.

Rre Hikuama o kgadile a se kgwe mathe boitshwaro jwa batho bangwe morago ga go nwa bojalwa mo ba felelang ba kgokgontsha le go bolaa tota.

O kopile ba Bodibeng go itshekatsheka gore ba ka lwantsha maitshwaro joo jang.

Motshwarelela Rramapodise a Sehithwa, Assistant Superintendent Moutwatsi Ikobeng o ne a kopa banni ba Bodibeng go tshwaraganela twantsho borukutlhi le mapodisi.

A re tiro ya sepodisi e tlhoka maiteko go tswa mo morafeng ka gantsi tshenyo mo metseng e bakiwa ke banni ba lefelo leo.

Asst Supt Ikobeng o tlhalositse fa mo nakong ya gompieno motse wa Bodibeng o nale lepodisi le le lengwe ka ntlha ya tlhaelo ya boroko.

A re boroko jo bo batletsweng lepodisi ga bo mo seemong se se kgotsofatsang ka jalo ba itsisitse lepodisi le le neng le tshwanetse go ya Bodibeng go emela boroko.

O tsweletse ka go supa fa mo nakong ya gompieno goromente a sena madi a go thapa mapodisi, ka jalo a tlhatlosa ba maemo a special constable go ba rutunstha go nna mapodisi a feletseng.

Ass Supt Ikobeng o kopile Kgosi le boeteledipele jwa Bodibeng go nna ba tshwara diphuthego tsa twantsho borukutlhi gangwe le gape go tswa ka metlhale ya go go bo lwantsha.

E ne e rile a amogela baeng, Kgosi Kazuu Mbakareratjike wa Bodibeng a tlhalosa fa borukutlhi bo golela pele mo motseng wa gagwe ka jalo a kopa ba sepodisi go oketsa badiri go lwantsha borukutlhi.

Kgosi o ne gape a bua fa ba kile ba thusa go batlela lepodisi boroko go tla go thusa modiri yo o leng teng mme ba seka ba atlega ka lepodisi le ise le tle.

O kopile ba sepodisi go tsisa mapodisi nako e khutshwane go dira ditlhotlhomiso tse di tseneletseng tse di tla nyeletsang bogodu jwa leruo le kgokgontsho. Ends