20 Dec 2022

 Rre Elfas Mcloud Shangwa go tswa kwa Farmer’s Pride International yo gape eleng  tautona le mosimolodisi  wa Hunters  Global   Network  a re  ditapole ke teemane e e ka fetolang matshelo a batho.

Rre Shangwa o buile mafoko ao kwa  Lobatse ka Matlhatso mo dithutong tsa go rutuntsha  ka go  lema ditapole mo kgetsing.

O boletse fa maikaelelo magolo a dithuto tse e le  go diragatsa nngwe ya dipilara tsa tebelopele ya  Sechaba ya 2036, ya go aga itsholelo ee ikaegileng ka dikitso le go rekisa dithoto kwa mafatsheng a sele. 

O ne a supa botlhokwa jwa temo-thuo ka e rurafatsa gore dijo di nna teng le gone go tlhama ditiro.

Rre Shangwa o tsweletse a bolela gore go tshwanetse ga rutintshiwa Batswana ba le dikete di lesome ka temo ya ditapole gore ba kgone go ijesa, ba jese lefatshe leno, mafatshe a a mabapi  le lefatshe ka bophara.

O tsweletse a bolela gore ditapole di lemiwa dipaka tsotlhe tsa ngwaga, a tlatsa ka go tlhalosa gore go lema mo kgetsing go thusa ka gore o kgona go tlhaola e e belaesegang e sa siama   mo go tse di siameng  ka jalo gago bonolo gore e ame dijalo tse dingwe.

Rre Shangwa o tsweletse a tlhalosa gore go botlhokwa gore go dirwe ditlhophana go bereka mmogo  go thusana ka di dirisiwa a re se se ka thusa go ntsha dijo tse di lekaneng mo lefatsheng leno.

Mo go tse dingwe o tlhalositse ka dintlha tsa botlhokwa mo temong  jaaka go tlhabolola banana ba Aferika mo temo-thuong, go ruta ka botlhokwa  jwa ditapole mo itshlelong ya lefatshe, le temo ya ditapole lefatshe ka bophara, a tlatsa gore ditapole dina le dikotla.

O tsweletse a bolela gore go lema ditapole mo kgetsingmolemi  o tshwanetse a bo oitse mofuta wa ditapole,dipoelo, tlhokomelo ya mofuta wa mmu, kgolo ya temo, thobo le tsa thekiso, tiriso ya di tswa ditapoleng.

Rre Shangwa o boletse gore ditapole di na le mosola le ditiro tse ntsi jaaka go dira dikuku tsa manyalo ,le dibisikitse.

A re ditapole di jewa dintlheng tsotlhe tsa lefatshe ka bophara. 

O ne a kgothatsa ditlhophana gore di bereke ka thata go bona maduo a maemo a ntlha go nyeletsa lehuma.

Mogokaganya ditiro wa Farmer’s Pride International  Mme  Thabana  Mohamadi o ne a supa  fa thuto-puisanyo e e atlegile ka ene e tsenwe ke batho go tswa  mo mafelong a farologaneng jaaka Thamaga,Lobatse, Metlojane,Gaborone,Dikwididi,Kanye,Tlokweng, Gakuto,Molapowabojang le Kgalagadi.

Kgosi Thebe Makwa wa Lekgolobotlo o  ne a  lebogela batsena dithuto tseo boitshoko le bopelotelele go tsaya di thuto ka tlhwaafalo a bolela ga go supa go tla nna le phetogo ka ba ithutile go le gontsi mme ebile matshelo a tla fetoga .

 BOKHUTLO