01 Dec 2022

E re le ntswa segajaja sa COVID-19 se nnile le manokonoko a a botlhoko mo bathong, go na le tse di molemo tse di neng tsa rojwa mo go one.

Kakanyo ya go rua mebutla ya nna nngwe ya tse di neng tsa tla mo tlhaloganyong ya ga Mme Catherine Sibanda.

Mme Sibanda wa dingwaga tse di masome a mane le boraro (43) wa kgotla ya Masololo mo Serowe o ne a dirisa nako e a neng a na nayo mo matsogong ka manontlhotlho.

Mme Sibanda yo ka letso a tlholegang kwa lefatsheng la Zimbabwe a re o simolotse thuo e ka ngwaga wa 2021 ka kgwedi ya Tlhakole.O supa fa go simololeng ga gagwe a ne a reka mebutla e le mebedi, o monamagadi le o motonanyana kwa go Rre Kgotla Rapitsenyane kwa Gaborone.

O tlhalosa fa a ngoketswe mo thuong e ke lorato le a nang nalo mo phologotswaneng e. A re mo nakong ya gompieno o na le mebutla e le masome a mararo, mebutla e ke letsopa la New Zealand.

“Mmutla o dusa malatsi a le masome a mabedi le boferabobedi (28) a bo o tsala mebutlana e le merataro go ya kwa go e le supa” a tlhalosa jalo.

Mme Sibanda o tlhalositse gore morago ga o sena go tsala o fa mebutlana sebaka sa go gola mme e re e le kgwedi tse tharo a bo a e kopanya le e mengwe ka jaanong e a bo e lekanye go ka gwelwa.

“Mebutla e e ja di pellet, mme fa ke le kwa tlase mo mading ke e fa merogo” a bua jalo. Mme Sibanda a re se se molemo ke gore dijo tsa mebutla ga di ture, a supa fa kgetsi ya 50kg ya di pellet e lopa P260 mme mebutla ya gagwe e tsaya dikgwedi di le pedi di ntse di e e ja.

A re go fokotsa ditshenyegelo o lemile tshingwana ya merogo go oketsa tse a fepang mebutla ya gagwe ka tsone. Mme Sibanda o kaile fa thuo e e batla motho yo o nnang mo lwapeng, gore a kgone go ela tlhoko tsotlhe tse di ka diragalang.

A re go botlhokwa gore morui wa mebutla a nne keletlhoko ka nako tsotlhe go itsa ditiragalo tse mebutla e ka dusang ya ba ya tsala go sa lemosega mme mebutlana ya swa ka ntlha ya go tlhoka tlhokomelo e e maleba.

A re ka tshwanelo fa mmutla o sena go tsala, o tshwanetse wa kgaoganngwa le e mengwe, wa bewa mo ntlwaneng e e faphegileng le mebutlana ya yone. A re se se direlwa go itsa gore mebutla e metonanyana e seka ya o tshwenya ka go batla go o gwela, a re go o kgaoganya le e mengwe gape go thusa go thibela gore mebutlana e bo e ka gatwa ke mebutla e mengwe.

“Tiro yame ya letsatsi le letsatsi ke go phephafatsa fa mebutla e nnang teng, go tsenya metsi a phepha le go netefatsa gore tsotlhe di apere tshiamo le go tlhola gore mebutla e menamagadi ga e ise e tsale” a gatelela jalo.

Se sengwe se a se gateletseng ke gore mebutla e tshwanetse go nna e nale metsi ka nako tsotlhe ka gore dijo tsa yone di nale mafura a mantsi mme ka jalo di tlhoka metsi a mantis go timola mafura.

A re mo letsatsing o di tshelela metsi ga bedi, a a tlhalositseng fa e se a go nwa fela, le go tlhapa gape mebutla e tlhapa ka one.

E re le ntswa ae agetse ntlwana e e nnang mo go yone, ga raro mo bekeng o e ntshetsa kwa ntle mo tshingwaneng ya merogo go ithapolola maoto. Gape a re se ke go e letlelela gore e tshameke ka ebile e rata go tshameka thata.

Mme Sibanda a re mebutla e ba e ruetse go e ja le go rekisetsa ba ba nang le keletso ya go reka mme a supa fa gantsi bangwe ba e rekela go ya go itshimololela kgwebo ya thuo ya mebutla.

O buile fa mebutla e e dikgwedi tse di masome a robang bobedi e le yone e gantsi bareki ba e rekelang go e ja fa ya thuo ba reka e santseng e le mennye.

Fa a buwa ka ditatlhegelo, a re go nale nako e a neng a sa ela tlhoko gore mmutla o mongwe o a dusa mme wa tsala a sa itse mme mebutlana ya felela e sule ka ntlha ya go tlhoka go tlamelwa.

E re le fa ntswa go nale malwetse a farologanyeng a a tshabelelang diruiwa, Mme Sibanda o kaya ga a ise a itemogele malwetse ape mo mebutleng ya gagwe.

 Mme Sibanda a re o beile mo maranyaneng gore a ithute ka metlhale e mengwe e a ka e dirisang go tlhabolola thuo ya gagwe. 

A re mo nakong ya gompieno o setse a rekisitse mebutla fela e le mene. Mme Sibanda o gateletse botlhokwa jwa go tlhokomela mebutla, a tlhalosa gore fa go le dipula o netefatsa gore o khurumetsa ntlwana ya tsone. BOKHUTLO