29 Nov 2022

 Lekalana la Kweneng Council Trust le banka ya ABSA ba abetse sepatela sa Scotish Livingstone le kgotla kgolo ya Bakwena ditanka tsa metsi tsa selekanyo sa 5 000 litres ele nngwe mongwe le mongwe

Erile fa a bua kwa moletlong wa kabo dimpho tseo, Modulasetilo wa Kweneng Council Trust, Rre Charles Keikotlhae o boletse fa e ne yare ba lemoga seru se seneng sa wela lefatshe leno ka lebaka la bolwetse jwa COVID 19, ba bona go le maleba gore ba kope dithuso go tlamela maphata a puso ka ditanka tsa metsi gore batho ba kgone go tlhapa matsogo go ipabalele mo bolwetsing jwa Corona.

A re le fa go ntse jalo banka ya ABSA e ne ya utlwa selelo sa bone mme ba ntsha ditanka tse pedi tsa dijojo go abela sepatela le kgotla. 

Rre Keikotlhae a re Kweneng Council Trust e na le lenaneo la go aba mme ebile ba setse ba dirile go tlala ka diatla go direla morafe. 

A re ba mo lenaneong la go agela dikole tse supa mo Kweneng metlobo ya dibuka.

Mo nakong ya gompieno, Rre Keikotlhae a re  ba setse ba kgonne go bona dibuka, ditafole le ditilo. 

O tlhalositse fa keletso ya bone ele go bona ba dira pharologanyo mo setshabeng.

Modulasetilo wa khansele ya Kweneng, Rre Motlhophi Leo, o tlhalositse fa maikaelelo magolo a lekalana la Kweneng Council Trust ntleng le go dira letseno, ele go tsenya letsogo mo ditirong tsa bopelotlhomogi le go nna le seabe mo go thuseng tshaba e ba direlang mo go yone. 

A re ke ka moo lekalana le, le dirileng ditiro tse di ntsi tsa bopelotlhomogi mo Kweneng ka bophara.

Erile fa a amogela mpho eo mothusa Kgosi ya Bakwena, Kgosi Lawrence Mhaladi, a galaletsa ba ABSA le lekalana la Kweneng Council Trust. A re o lebogetse mpho eo go menagane ebile ba tswelele ka go dira tiro e ntle e ba e dirang mo morafeng ka kakaretso.

Fa a amogela mpho eo boemong jwa bogogi jwa sepatela, Dr. Terence Mukuhwa o akgotse Kweneng Council Trust le ba ABSA go bo ba supile boeteledipele jo bo nonofileng ebile gape ba bone botlhokwa jwa go ba thusa gore sepatela se bone metsi ka a lebotlhokwa thata mo botsogong jwa setshaba.

A re o lebogetse banka ya ABSA go kgaogana dithuto tsa madi le bone le gone go ipha nako ya go tlhola badiredi ba botsogo go arogana maele a botshelo ka go tlhakanela letsatsi leo le bone.  BOKHUTLO