28 Nov 2022

Banni ba Kanye ba atlile mogopolo wa go godisa khansele potlana ya Kanye go nna khansele kgolo. Ba galaleditse maiteko a puso, ba supa fa thulaganyo e e tlaa ba thusa ka ditlamelo di tla a bo di le gaufi le bone.

Ba buile jalo fa ba a kgwa dikgaba tekodiso ya Tona wa Lephata la Dikgaolo le Tlhabololo Magae, Rre Kgotla Autlwetse fa a buisanya le banni ba Kanye ka lenaneo la phatlalatso ditirelo le ditlamelo kwa Kanye bosheng.

Rre Autlwetse o supile fa thulaganyo e, e akaretsa dikhansele di le masome mabedi le bobedi, mme go fetisitswe di le lesome le bongwe pele, e re ngwaga o o tlang ka kgwedi ya Moranang go bo go fetisiwa tse di setseng.

A re ba simolotse ka dikhansele potlana tse, Tutume, Boteti, Mahalapye, Maun, Okavango, Tsabong, Hukuntsi, Goodhope, Molepolole le Mogoditshane, Letlhakeng. A tlatsa ka gore madi otlhe a tiro eo, a tshwara P63 million A re tshwetso e, e dirilwe go lebeletswe dipalo tsa batho ka bophara, sekgele se batho ba se tsamayang go latela ditlamelo.

Rre Autlwetse a re ba tlhatlhositse maemo dikhansele potlana tse di setseng dina le dikago, go dira tiro motlhofo. O supile fa thulaganyo e, konokono ya teng e le go tsisa ditlamelo gaufi le batho, le go boloka madi mo tsamaisong ya dikhansele tseo ka nako ya diphuthego.

A re go tlhokega madi a mantsi go aga dikokelo le dikole, jalo thulaganyo e e ka thusa go dira ditlhabololo mo metseng ka go farologana. Rre Autlwetse o boletse fa gape thulaganyo e ntseng e le teng e le turu, gape go tsaya lobaka gore go tsewe ditshwetso, ka dikhansele potlana di tshwanetse go emela bokopano jwa khansele kgolo.

O tlhalositse  fa bodiredi jwa puso le jone bo tlaa tlhatlosiwa maemo gore maemo a bone a lekane le boikarabelo jo ba tla a bong ba bo neetswe. 

Fa a latlhela la gagwe, Modulasetilo wa Khansele ya Borwa, Rre Thamiso Chabalala a re konokono ya puso mo thulaganyong e, ke go isa ditlamelo ko bathong.

Rre Chabalala a re go tsamaya sekgala go latela ditlamelo go senyetsa batho madi. O tladitse fa tshwetso eo, e tla a thusa go fedisa tshenyetso setshaba. A re o leboga thata gore Tona Autlwetse le ba lephata la gagwe ba bo ba lemogile botlhokwa jwa go dira jalo, a tlatsa ka gore o eletsa fa maphata a mangwe le one a ka kopa thulaganyo eo. BOKHUTLO