16 Nov 2022

Dipodi di le supa kwa polaseng ya Lobu, mo Kgaolong ya Kgalagadi Borwa di bolailwe ke legadima beke ee fetileng.

Mo potsolosong ka Labobedi, mogolwane go tswa kwa polaseng eo, Rre Bright Matshaba o boletse fa e ne ya re pula e tsweletse e na dipodi tseo tsa tshabela kwa tlase ga setlhare sa Mokala gaufi le lesaka la tsone mme ka go tlhoka lesego legadima la ratha setlhare seo gammogo le dipodi tseo.

Rre Matshaba a re go sule dipodi di le thataro gone  foo mme morago ga a swa e nngwe selo se a supileng fa e le poelo morago ka e ne e le tse di tonanyana tsa letsopa la Boer Goat.

O boletse fa tiragalo eo e le la ntlha e diragala fa e sale polase ya Lobu e simolodisiwa ka ngwaga wa 1978. 

Fa a tlhalosa ka maikaelelo a polase eo, Rre Matshaba  a re e thusa barui ba Kgaolo ya Kgalagadi le Batswana ka kakaretso go tlhabolola leruo la bone le go rekisetsa barui leruo ka ditlhwawatlhwa tse di kwa tlase.

Rre Matshaba a re polase eo ee dikhilommethara di ka nnang lekgolo le lesome.  

A re e na le leruo le le fetang dikete tse tharo mme mo palong eo dihutshane di feta dikete tse pedi fa dikgomo tsone di le masome a marataro le bongwe mme dipitse di le masome a mabedi le bosupa. ENDS