16 Nov 2022

Lephata la diphologolo le makgabisa naga le tshwentswe ke go thaisiwa ga diphologolo mo metseng ya Sankoyo, Mababe le Khwai.

E rile a bua kwa phuthegong ya komiti e e kganelang go bolawa ga diphologolo mo go seng ka fa molaong, modiri wa lephata la diphologolo le makgabisa naga, Rre Kenosi Nfandiso a tlhalosa fa diphologolo di le thataro di ne tsa tshwarwa ke di selaga go simolola Hirikgong go ema ka Phukwi.

A re mo diphologolong tse, tse nne e ne e le matlhalerwa a a fitlhetsweng ka terata mo melaleng le maoto, tau ele nngwe ka terata mo molaleng le pitse ya naga e e neng e tshwerwe mo leotong.

Rre Nfandiso o tlhalositse fa ba ne ba tswa letsholo la go ntsha dilaga mo nageng ya Khwai, Mababe le Sankoyo ka kgwedi ya Seetebosigo ko ba neng ba tswa ka dilaga tseo di le lekgolo le boferabobedi.

O ne a akgola morafe wa Sankoyo go bo ba tshwaraganetse tiro ya go lwantsha polao ya diphologolo le ba Sankoyo Community Development Trust a re maiteko a ke one a dirileng gore dipalo tsa go thaisa diphologolo di bo di le kwa tlase go tshwantshangwa le metse e mengwe.

Rre Nfandiso o ne a rotloetsa batsenelela phuthego  go tswelela ba ruta ba bangwe ka bodiphatsa jwa go thaisa diphologolo a re se se ka nyeletsa diphologolo mme kwa bofelelong go ame itsholelo ya Botswana ka e ikaegile ka bojanala.

O ne a kopa banni go ikgolaganya le ofisi ya bone fa diphologolo tsa naga di ba senyetsa mo masimo, a tswelela ka gore lephata la bone le tla ba rutuntsha ka metlhale e letlelesegang ya go go tshwara diphologolo.

Banni ba ne ba supa fa ba tshwentswe ke gore diphiri le ditau ka di ba latela mo metseng di ja dipodi ebile di tsenya matshelo a bone mo diphatseng.

Ba tsweletse ka go ngongoregela nako e ba lephata la diphologolo ba e tsayang go tsibogela pego ya tshenyo ya diphologolo mo go felelang go baka gore batho ba itseele tshwetso ya go thaisa diphologolo.

Morafe wa Sankoyo o tlhalositse fa o itshetsa ka go lema le go rua dipodi ka jalo ba re fa diphologolo tsa naga di ba tsenelela mo masimo le masaka ba sala ba itshopere.

Ba re go bo ba tshwaragane le Trust ya motse e e ba rutuntshang ka metlhale ya go tshela le diphologolo le botlhokwa jwa tsone mo itsholelong ke gone go thusang gore ba seka ba itseela molao ka go di gobatsa. 

ENDS